Ուկրաինայի նախագահ Վիկտոր Յանուկովիչը ենթադրում է, որ ազատազրկման մեջ գտնվող նախկին վարչապետ Յուլյա Տիմոշենկոն կարող է առնչություն ունենալ պատգամավոր Եվգենի Շչերբանի սպանությանը:
«Հանցագործությունները կատարվել են Տիմոշենկոյի մասնակցությամբ»,- Bloomberg-ի հետ զրույցում նշել է երկրի նախագահը:
«Դա գաղտնիք չէ ողջ աշխարհի համար` դա տեղի է ունեցել: Այդ թվում` Շչերբանի սպանությունը: Գոյություն են ունեցել մոտիվներ»,- ենթադրում է Յանուկովիչը:
Նախագահի խոսքերով` Ուկրաինայի վրա քաղաքական ճնշումներ են գործադրում, սական ինքը ցանկանում է, որ այդ խնդրին նայեն օրենքի տեսանկյունից:
Հիշեցնենք, որ Եվգենի Շչերբանը սպանվել է 1996 թ. նոյեմբերի 3-ին Դոնեցկի օդանավակայանում` Մոսկվայից ժամանելիս: Հանցագործները դեպքի վայրից փախել էին ավտոմեքենայով:
Պատգամավորը, նրա կինը, ինքնաթիռի մեխանիկն ու ինժեները մահացել էին ստացած վնասվածքներից:
Մինչ այդ՝ ապրիլի սկզբին, պատգամավորի որդին` Ռուսլան Շչերբանը խոստացել էր մոտ ապագայում հրապարակել հոր սպանության «որոշ սենսացիոն» տեղեկություններ, որոնք ապացուցում են Լազարենկոյի (գլխավորել է Ուկրաինայի կառավարությունը 1996 թ. մայիսի 28-ից մինչև 1997 թ. հուլիսի 2-ը) ու Տիմոշենկոյի մասնակցությունը սպանությանը:
