Բջջային սարքեր արտադրող HTC ընկերությունը հաստատել է իր մտադրությունը գնելու գրաֆիկական պրոցեսորներ արտադրող S3 Graphics ընկերությունը: Այս մասին հաղորդում է Focus Taiwan-ը:
Այն մասին, որ գործարքը կկայանա, հայտարարել է ընկերության իրավաբան Գրեյս Լեյը՝ HTC-ի բաժնետերերի ամենամյա ժողովում: Ընկերությունը գնելու բուն նպատակը S3 Graphics-ի արտոնագրային պորտֆոլիոն է:
S3 Graphics-ին է պատկանում շուրջ 270 արտոնագիր: Մի քանի արտոնագրեր լիցենզիայով օգտագործում են Microsoft-ը, Nintendo-ն և Sony-ն:
S3 Graphics-ը ձեռք բերելու ծրագրի մասին HTC-ն հայտարարել էր 2011-ի հուլիսին: Հաղորդվում էր, որ գործարքի արժեքը կկազմի 300 միլիոն դոլար: 2011-ի նոյեմբերին, սակայն, Apple և S3 Graphics-ի միջև ծագած արտոնագրային պատերազմում ԱՄՆ-ի միջազգային առևտրի հարցերով հանձնաժողովը արդարացրեց Թիմ Կուկի ընկերությանը: Դա HTC-ի աչքում նվազեցրեց S3 Graphics-ի գրավչությունը:
Հավանաբար HTC-ն որոշել է գործարքից չհրաժարվել իր սարքերի նկատմամբ կիրառված նոր պատժամիջոցների պատճառով, որոնք սահմանվել են Apple-ի նախաձեռնությամբ: 2012-ի ապրիլին արգելվել էր HTC One X և HTC EVO 4G LTE սմարթֆոնների մուտքը ԱՄՆ-ի տարածք: Ավելի ուշ արգելքը հանվեց, սակայն Apple-ը HTC-ի դեմ կրկին հայց ներկայացրեց ԱՄՆ-ի միջազգային առևտրի հարցերով հանձնաժողով:
CNET News-ի փոխանցմամբ՝ S3 Graphics-ի արտադրած գրաֆիկական պրոցեսորները նախատեսված են համակարգիչների և նոթբուքերի, ինչպես նաև բջջային սարքերի համար: S3 ընկերությունը հիմնադրվել է 1989 թվականին: S3 Graphics-ը, որը զբաղվում է գրաֆիկական պրոցեսորների արտադրությամբ, ձևավորվել է 2000 թվականին, երբ S3-ը իր մասնաճյուղերից մեկը վաճառել է VIA ընկերությանը:
