ԱԺ «Ժառանգություն» խմբակցության պատգամավոր Անահիտ Բախշյանի համար Երևանում սիրելի հուշարձան է Հանրապետության հրապարակը, Մայր Հայաստանի արձանը. «Ինձ համար շատ արժեքավոր է Մայր Հայաստանը, ես ոգևորվում եմ, երբ նայում եմ նրան, շատ սիրում եմ Կասկադը, Առնո Բաբաջանյանի արձանը: Ամեն անգամ Առնոյի արձանի մոտով անցնելիս իր երաժշտությունն եմ լսում, հատկապես դաշնամուրայինը»:
Անահիտ Բախշյանը զզվանքով է նայում հատկապես Օղակաձև զբոսայգու բետոնե պատերին. «Զզվում եմ, երբ նայում եմ օղակաձև այգու բետոնե պատերին, ուղղակի ուզում եմ կռիվ անել քաղաքապետարանի հետ, առաջ շատ գեղեցիկ էր, երեխաներն ինչ լավ էին խաղում, վազվզում, իսկ հիմա դրանք պարզապես անհասանելի են»:
Պատգամավորը կարծում է , որ քաղաքը շատ է հեռացել երեխաներից և այն պետք է հարմարեցնել նրանց. «Մեր քաղաքը երեխաներից հեռացել է ինչքան հնարավոր է, ես դա ասելով` նկատի չունեմ կենտրոնը, թաղամասերի բակերը լի են գարաժներով և տարբեր մանր-մունր խանութներով, կուզենայի, որ ավելի կանաչապատվեր, բոլորս էլ կուզենք, որ Երևանը լինի ավելի մաքուր, կանաչ, ծաղկազարդ և բնակիչներին ու հատկապես երեխաներին հարմարեցված»:
