ՀԱԿ–ի իրավունքն է՝ ցանկացած երևույթի մասին սեփական տեսակետն արտահայտել: «Առաջին լրատվական»-ի հետ զրույցում նման տեսակետ հայտնեց ՀՀԿ-ական պատգամավոր Արտակ Դավթյանը՝ անդրադառնալով ՀԱԿ համակարգող Լևոն Զուրաբյանի հայտնած այն մտքին, թե ինքը չի զարմանա, եթե պարզվի, որ ՀՀ նախկին ԱԳ նախարար Վարդան Օսկանյանի հետապնդումներն իրականացվում են քաղաքական հողի վրա:
«Միաժամանակ, բնական է, որ Լևոն Զուրաբյանի հայտնած տեսակետն անցնում է ՀԱԿ-ի ընդհանուր դիրքորոշման և պրիզմայի միջով: Բայց թե որքանով է նա իր տեսակետներն արտահայտելիս անկեղծ եղել, դա թողնենք քաղաքացու դատին»,- ասաց Արտակ Դավթյանը:
Նա նաև նշեց, որ չի կարծում, թե ՀԱԿ-ում չներկայացված որևէ անհատ նրա պաշտպանության կարիքն ունի. «Սա այն դեպքում, երբ մանավանդ խոսքը գնում է խորհրդարանական երկրորդ ուժի մասին»:
Նշենք, որ երեկ տարածված տեղեկության համաձայն՝ Վարդան Օսկանյանը կանչվել էր ԱԱԾ հարցաքննության՝ կապված իր կողմից հիմնադրված «Սիվիլիթաս» հիմնադրամում հայտնաբերված ֆինանսական խախտումների հետ:
Օսկանյանն իր հերթին հայտարարել էր, որ իր հանդեպ հետապնդումներ իրականացվում են քաղաքական դրդապատճառներով:
Այսօր Ազգային անվտանգության ծառայությունը հայտարարություն է տարածել, որով փորձ է արել ցույց տալ, որ հարուցված քրեական գործը քաղաքական պատվեր չէ:
Օսկանյանն ի պատասխան հայտարարել է. «Կրկնում եմ՝ դա միանշանակ քաղաքական պատվեր է, և ուզում եմ ասել հետևյալը՝ «փողերի լվացում–Օսկանյան–Հանթսման» բառերը մեկ նախադասության մեջ չեն կարող լինել:
