«ՀՀ վարչապետ Տիգրան Սարգսյանը երեկ ՌԴ վարչապետ Դմիտրի Մեդվեդևին ուղերձ է հղել Ռուսաստանի օրվա կապակցությամբ, որին կարիք չէր լինի անդրադառնալ, եթե դրանից առաջ մեկ այլ «նշանակալի» իրադարձություն տեղի ունեցած չլիներ»,- գրում է «ՀԺ»-ն և հավելում.
«Իսկ «նշանակալի» իրադարձությունն այն է, որ ՀՀ վարչապետի ուղերձից մի քանի ժամ առաջ էլ ՌԴ վարչապետն է նրան ուղերձ հղել՝ շնորհավորելով վերանշանակվելու կապակցությամբ: Տիգրան Սարգսյանը ՀՀ վարչապետ է վերանշանակվել 10 օր առաջ՝ հունիսի 2-ին:
Այսինքն` ակնհայտ է, որ Մեդվեդևը և ընդհանրապես ռուսները նրա մասին մոռացել էին և հիշել են, երբ ՀՀ վարչապետի ուղերձի հարցն է օրակարգում հայտնվել: Ուղերձների հրապարակման հաջորդականությունը հուշում է, որ Տ. Սարգսյանը, մինչև իր ուղերձը տալը, նախ պնդել է, որ Մեդվեդևն իր շնորհավորանքը «տա»: Իհարկե, բացառված չէ նաև, որ Տիգրան Սարգսյանը երեկ, լույսը բացվելուն պես, իր ուղերձն է հղել, բայց չի հրապարակել` վստահ լինելով, որ դրանից հետո Մեդվեդևն իր մասին կհիշի և մոռացված շնորհավորանքը կտա` եղածը մի բան չի»:
