Մամուլի ասուլիսի ժամանակ լրագրողները Ահարոն Ադիբեկյանից հետաքրքրվեցին, թե որքանով է նա հնարավոր համարում Ռոբերտ Քոչարյանի վերադարձը քաղաքականություն: Պարզվեց, որ Ռոբերտ Քոչարյանի վարկանիշը, ըստ ադիբեկյանական սոցհարցումների, 2.5 տոկոս է:
Ահարոն Ադիբեկյանը նշեց, որ դա կապված է այն բանի հետ, որ Ռոբերտ Քոչարյանի ընտանիքի տնտեսական և ֆինանսական հնարավորությունների մասին եղավ բացասական տեղեկատվական արտահոսք, որոնք նա չկարողացավ հստակ կերպով հերքել: Ըստ Ադիբեկյանի` Ռոբերտ Քոչարյանն իշխանության եկավ որպես Արցախյան պատերազմի առաջնորդներից մեկը: Սակայն, քանի որ Արցախի հիմնահարցն այսօր, ըստ Ադիբեկյանի, մղվել է հետին պլան և չի համարվում մեր հասարակության համար առաջնահերթ խնդիր, Ռոբերտ Քոչարյանն էլ կորցրել է իր վարկանիշը:
Ահարոն Ադիբեկյանը նշեց, որ հայ հասարակության համար այսօր առաջնահերթ են դարձել տնտեսական խնդիրները, սահմանների բացումը, հայ-թուրքական հարաբերությունները: «Իշխանության գալիս են ոչ թե այն դեպքում, երբ ցանկանում են, այլ` երբ հենվում են բավականին լուրջ կառույցի վրա»,- անդրադառնալով Քոչարյանի թեմային` ասաց Ադիբեկյանը:
Ինչ վերաբերում է ընտրությունների ժամանակ ընտրողներին կաշառելուն, Ահարոն Ադիբեկյանը նշեց, որ ինքը գիտի, որ ձայները առնում են, և առնելու հազար ու մի ձև կա: Այդ ձևերից մեկն էլ, ըստ նրա, սերմնացու բաժանելն է կամ լույսի վարձը փակելը: