ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ ԵԱՀԿ գործող նախագահ, Իռլանդիայի Հանրապետության փոխվարչապետ և արտաքին գործերի նախարար Էմոն Գիլմորի գլխավորած պատվիրակությունը հունիսի 12-ին հանդիպել է Ազգային ժողովի խմբակցությունների ներկայացուցիչների հետ:
ՀՀԿ խմբակցության անդամ, ԱԺ արտաքին հարաբերությունների հանձնաժողովի նախագահ Արտակ Զաքարյանը, ողջունելով պատվիրակության այցը տարածաշրջան, բարձր է գնահատել ԵԱՀԿ-ի` որպես անվտանգության և ռազմաքաղաքական կարևոր նշանակություն ունեցող կազմակերպության դերը: Պատգամավորը հույս հայտնեց, որ խորհրդարանականների հետ հանդիպումը ԵԱՀԿ գործող նախագահին հնարավորություն կտա էլ ավելի ամբողջական պատկերացնել Լեռնային Ղարաբաղի հակամարտության վերաբերյալ կողմերի դիրքորոշումները:
ԲՀԿ պատգամավոր Վարդան Օսկանյանը հանդիպման ընթացքում խոսել է ԼՂ հակամարտության մասին` այն մի քանի առումներով մտահոգիչ համարելով: Նախ, որ վերջին դեպքերը տեղի ունեցան Հայաստանի և Ադրբեջանի սահմանին, ու նաև` ԱՄՆ պետքարտուղար Հիլարի Քլինթոնի այցի օրերին: Վարդան Օսկանյանի կարծիքով` սա Ադրբեջանի կողմից հատուկ էր արված և որոշակի ուղերձ էր: Ըստ նրա` ադրբեջանական կողմը ցանկանում է ասել, որ իրենք «հիասթափված են» բանակցային գործընթացից և հարցն ուզում են լուծել ռազմական ճանապարհով: «Մինչդեռ հիասթափությունը հենց իրենց պատճառով է. բանակցությունների ընթացքում այնպիսի պահանջներ են դնում, որոնք ծայրահեղական են ու անիրականանալի»,- նկատել է պատգամավորը:
«Հայ ազգային կոնգրես» խմբակցության ղեկավար Լևոն Զուրաբյանը, անդրադառնալով ղարաբաղյան հիմնախնդրին և կիսելով նախորդ բանախոսի տեսակետը, անհրաժեշտ համարեց, որ ԵԱՀԿ-ն դատապարտի Ադրբեջանի ռազմական գործողությունները: ՀԱԿ ներկայացուցիչը նշեց, որ ԵԱՀԿ-ն ոչ միայն անվտանգության, այլև ժողովրդավարացման գործում մեծ դերակատարություն ունի:
«Օրինաց երկիր» խմբակցության քարտուղար Մհեր Շահգելդյանը ևս բարձր է գնահատել ԵԱՀԿ Մինսկի խմբի դերակատարությունը Լեռնային Ղարաբաղի հիմնախնդրի խաղաղ, բանակցությունների միջոցով հանգուցալուծման գործում: Նա ԵԱՀԿ-ի ուշադրությունը հրավիրեց հայ-ադրբեջանական սահմանին ադրբեջանական զինված խմբավորումների նախաձեռնած գործողություններին, որոնք ուղեկցվում են զոհերով: Պատգամավորն անհրաժեշտ համարել, որ ԵԱՀԿ-ի մոտեցումները լինեն հստակ և կոնկրետ:
Խմբակցությունների ներկայացուցիչներն իրենց տեսակետները ներկայացրել են նաև մայիսին կայացած խորհրդարանական ընտրությունների, ժողովրդավարական գործընթացների առնչությամբ:
ԵԱՀԿ գործող նախագահն արձագանքել է բարձրացված հարցերին: «Այն, ինչ ասում եմ այսօր Երևանում, ասելու եմ վաղը Բաքվում. Լեռնային Ղարաբաղի համակարտության ռազմական որևէ լուծում չի լինելու», -ընդգծել է նա: Պրն. Գիլմորի խոսքերով` իրենց համար մերժելի է ուժի կիրառումը. հակամարտությունը կարող է լուծվել միայն խաղաղ բանակցությունների միջոցով: Այս համատեքստում ԵԱՀԿ գործող նախագահը կարևորեց աջակցությունը ԵԱՀԿ Մինսկի խմբին` իր առաքելությունն իրականացնելու և երեք հիմնական սկզբունքներն առաջ տանելու համար: Ազգերի ինքնորոշման, տարածքային ամբողջականության և ուժի չկիրառման սկզբունքները, նրա համոզմամբ, անբաժանելի են: ԵԱՀԿ նախագահի գնահատմամբ` պետք է վերջ դրվեն թե սահմանային միջադեպերին, թե դիպուկահարների գործողություններին: «Պետք է մեխանիզմներ գտնել այդ միջադեպերը հետաքննելու համար»,- ասել է ԵԱՀԿ գործող նախագահը` հավելելով, որ ԼՂ հակամարտությունը գերխնդիր է թե ԵԱՀԿ-ի և թե իր համար` իր պաշտոնավարման տարիներին:
Ժողովրդավարական գործընթացների, խորհրդարանական ընտրությունների մասին խոսելով` Էմոն Գիլմորը նշել է, որ ԵԱՀԿ/ԺՀՄԻԳ-ի` ԵԽ-ի հետ համագործակցաբար պատրաստած զեկույցն առաջարկներ է պարունակում: «Հույս ունեմ, որ այնտեղ ընդգրկված առաջարկները իրականություն կդառնան»,-ասել է ԵԱՀԿ պաշտոնյան: Նրա տեղեկացմամբ` իր ուշադրության կենտրոնում է ԶԼՄ-ների ազատությունը, ինչը քննարկվել է նաև իշխանությունների հետ հանդիպումների ժամանակ: Պարոն Գիլմորը հավաստիացրել է, որ ԵԱՀԿ-ն պատրաստ է աջակցել այս հարցում ևս: «ԵԱՀԿ-ն մշտապես աջակցում է ժողովրդավարության և օրենքի գերակայության սկզբունքներին»,- նշել է ԵԱՀԿ գործող նախագահը:
