Apple ընկերությունը Սան Ֆրանցիսկոյում ընթացող Ծրագրավորողների համաշխարհային կոնֆերանսի ժամանակ ներկայացրել է iPhone սմարթֆոնների, iPod նվագարկիչների և iPad պլանշետների համար օպերացիոն համակարգի նոր տարբերակ՝ iOS 6-ը: Այս մասին հայտնում է Engadget-ը:
iOS 6 -ում հայտնվել են շուրջ 200 նոր գործառույթներ: Ձայնային Siri օգնականը նոր օպերացիոն համակարգում հասանելի կլինի երրորդ սերնդի iPad պլանշետներին: Նախկինում Siri-ն հասանելի էր միայն iPhone 4S-ին:
Նոր օպերացիոն համակարգը կհամագործակցի Facebook սոցիալական ցանցի հետ: Ցանցի իրադարձությունները կարտացոլվեն օգտատիրոջ օրացույցում: FaceTime տեսակապը կաշխատի նույնիսկ այն ժամանակ, երբ օգտատիրոջ սարքը միացված լինի բջջային ցանցին:
iOS 6-ի «Քարտեզներ» հավելվածում Google Maps-ի փոխարեն ընկերությունն օգտագործել է սեփական քարտեզները, որոնք կապված են ձայնային օգնականի հետ: Որոշ քաղաքներ, դեռևս հայտնի չէ որոնք, պատկերված կլինեն եռաչափ ձևաչափով:
iOS 6-ի բետա-տարբերակը լույս է տեսել հունիսի 11-ին: Օպերացիոն համակարգը կարող են տեղադրել 2-րդ և 3-րդ սերնդի iPad պլանշետների, iPhone 3GS, iPhone 4 և iPhone 4S սմարթֆոնների և 4-րդ սերնդի iPod նվագարկչի տերերը:
iOS օպերացիոն համակարգը թողարկվել է 2007 թվականին՝ iPhone OS անվան ներքո: iOS-ի 5-րդ տարբերակը՝ iOS 6-ը, գովազդվել էր 2011-ի հունիսին:
