Նախօրեին Տրաբզոնում Թուրքիայի, Ադրբեջանի ու Վրաստանի միջև կնքված եռակողմ համագործակցության հռչակագիրն ուղղված է Հայաստանին տարածաշրջանային գործընթացներից մեկուսացնելուն: «Առաջին լրատվական»-ի հետ զրույցում նման տեսակետ հայտնեց Քաղաքագետների միության նախագահ Հմայակ Հովհաննիսյանը:
«Սա մեր երկրի մեկուսացման լուրջ սպառնալիք է: Այդ երեք պետությունները, փաստորեն, սերտացնում են իրենց համագործակցությունը՝ այդ գործընթացից դուրս մղելով Հայաստանին, և դրանով իսկ նպաստելով նրա մեկուսացմանը: Թուրքիան, Ադրբեջանն ու Վրաստանը շատ լավ գիտակցում են, որ լայնածավալ տարածաշրջանային համագործակցության ծրագրեր են իրականացնում առանց մեր երկիրը դրանց մեջ ներառելու, և որ դա ի վերջո հանգեցնելու է նրա մեկուսացմանը և բացասաբար է ազդելու Հայաստանի վրա: Մինչդեռ տարածաշրջանային համագործակցությունը պետք է ընդգրկի տարածաշրջանի բոլոր երկրները»,- ասաց քաղաքագետը:
Հիշեցնենք, որ հունիսի 8-ին Տրաբզոնում տեղի ունեցած հանդիպման ավարտին Թուրքիան, Ադրբեջանն ու Վրաստանը եռակողմ համագործակցության հռչակագիր են ստորագրել՝ երեք երկրների արտգործնախարարների միջև:
«Մենք գործողությունների ծրագիր ենք մշակում առաջիկա երեք տարիների համար»,- հայտարարել է Թուրքիայի արտգործնախարար Ահմեդ Դավութօղլուն և ընդգծել, որ երեք երկրները կհամագործակցեն տրանսպորտի, էներգետիկայի, զբոսաշրջության և մշակույթի բնագավառներում։
Հանդիպումից հետո Վրաստանի արտգործնախարար Գրիգոլ Վաշաձեն հայտարարել է, թե եռակողմ համագործակցության այս ձևաչափն ուղղված չէ որևէ երրորդ երկրի դեմ։