ՀՀ տնտեսությունում աճում է ռիսկայնությունը, ինչի վկայությունն է դոլարայնացման մակարդակի գրանցվող աճը: Կենտրոնական բանկի ապրիլ ամսվա տեղեկագրի համաձայն՝ այս տարվա մարտի համեմատ արժութային ավանդների հարաբերակցությունն ընդհանուր ավանդներին ավելացել է 0.6 կետով՝ կազմելով 60.6։ Ֆիզիկական անձանց արտարժույթով ցպահանջ ավանդների կշիռն ընդհանուրի նկատմամբ ավելացել է 1.1-ով՝ կազմելով 55.0, արտարժույթով ժամկետային ավանդների կշիռն ընդհանուրի նկատմամբ՝ 0.3 կետով՝ կազմելով 73.6, իսկ ռեզիդենտ իրական հատվածին արտարժույթով տրամադրված վարկերի հարաբերակցությունն ընդհանուր վարկերին աճել է 0.4-ով՝ կազմելով 62.6:
Առևտրային բանկերն ապրիլին տրամադրել են ՀՀ դրամով 507 մլրդ 856 մլն դրամ վարկեր, որը մարտի համեմատ ավելի է 2.12 %-ով, իսկ արտարժութային վարկերի ծավալը կազմել է դրամով արտահայտված 847 մլրդ 340 մլն՝ մարտի համեմատ աճը 3.4 % է: Այսինքն, բացի այն, որ արտարժութային վարկերն առանց այն էլ 1.7 անգամ գերակշռում էին, այժմ փաստորեն արտարժութային վարկերի ծավալը դրամայինի նկատմամբ ավելի արագ է աճում:
Հիշեցնենք, որ բանկային համակարգում դոլարայնացման մակարդակի իջեցման նպատակով ԿԲ-ն 2011-ի փետրվարին սահմանել էր առևտրային բանկերի կողմից արտարժույթով ներգրավված միջոցների դիմաց ԿԲ-ում տեղաբաշխվող պարտադիր պահուստների նվազագույն չափի նոր նորմատիվներ։ Դրանք փաստորեն ցանկալի արդյունք ժամանակավորապես ապահովեցին:
