Ադրբեջանական Trend լրատվական գործակալության փոխանցմամբ՝ վրացական ավիաշուկայում շուտով սկսելու է գործել վրաց-արաբական Air Caucasus ավիաընկերությունը: Այս մասին լրագրողների հետ զրույցում հայտարարել է սնանկության շեմին հայտնված Sky Georgia ընկերության տնօրեն Գեորգի Կոդուան, որը լինելու է նոր ընկերության խորհրդատուն:
Կոդուայի խոսքերով՝ Air Caucasus-ում կատարվել են վրաց-արաբական ներդրումներ, իսկ բաժնետոմսերի վերահսկիչ փաթեթը պատկանելու է վրացական կողմին. «Նոր ավիաընկերությունը կանոնավոր թռիչքներ է իրականացնելու ԱՊՀ-ի, Եվրոպայի ու Ասիայի երկրներ: Հոկտեմբերից սկսած՝ ավիաընկերությունը թռիչքներ է իրականացնելու նաև Թբիլիսի-Քութայիս ուղղությամբ:
Քանի որ Վրաստանի խորհրդարանը Թբիլիսիից տեղափոխվում է Քութայիս, ուստիև կառավարության անդամները ստիպված կլինեն հաճախակի մեկնել արևմուտք: Դրա համար էլ ավիաընկերությունը վճռել է 12 ամսվա ընթացքում ամենօրյա թռիչքներ իրականացնել Թբիլիսիից Քութայիս: Դա տեղի կունենա այն բանից հետո, երբ շահագործման կհանձնվի Քութայիսի օդանավակայանը:
Տոմսն արժենալու է 25 դոլար: Եթե պահանջարկը մեծ լինի, հնարավոր է հետագա թռիչքների համար պայմանները վերանայվեն»:
