Երեկ «Ժամանակ»-ի խմբագրությունը ահազանգ ստացավ Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցից. գրասենյակ էին դիմել Լոռու մարզի Լեռնապատ համայնքի մի խումբ բնակիչներ, ովքեր ականատես էին եղել, թե ինչպես է Լեռնապատի գյուղապետ Վանո Եղիազարյանը խոչընդոտում իր դեմ հարուցված քրեական գործի նախաքննությանը. նա իր ծառայողական ավտոմեքենայով ոստիկանության Գուգարքի բաժին է բերում գյուղի որոշ բնակիչների և ուղղորդում նրանց` ցուցմունքներ տալիս:
Գրասենյակին, ինչպես նաև Լոռու մարզի դատախազին և ՀՀ գլխավոր դատախազին ուղղված նամակում մասնավորապես նշված է. «…Լեռնապատ համայնքի գյուղապետ Վ.Եղիազարյանի նկատմամբ արդեն մեկ տարի է հարուցված է քրեական գործ: Գործով վկաներին, որոնք նախկինում ցուցմունքներ են տվել գյուղապետի դեմ, Վ.Եղիազարյանը ստիպում է փոխել այդ ցուցմունքները… գյուղապետը այն աստիճանի է ոգևորված իր բարձրաստիճան հովանավորներից, որ օրը ցերեկով իր ծառայողական մեքենայով Գուգարքի ՆԳ բաժին էր բերել Լեռնապատի բնակիչ Ալբերտ Օվիյանին, որը նախկինում ցուցմունք էր տվել այն մասին, որ գյուղապետը մի քանի տարի առաջ իրենից վերցրել էր խոզ, որպեսզի հետագայում սեփականաշնորհի Ալբերտ Օվիյանի հողամասը: Իսկ այսօր գյուղապետի ուղեկցությամբ Ալբերտ Օվիյանը գալով Գուգարքի ՆԳ բաժին, հրաժարվել է իր նախկին ցուցմունքից… Գյուղապետի հետ կեղծիքներ է կատարել նաև Լեռնապատի «Հայփոստի» բաժանմունքի վարիչ Մարինե Աշրաֆյանը: Գյուղապետը քավոր-սանիկական կապերի մեջ է վերոհիշյալի հետ: Ավելացնենք նաև, որ Մարինե Աշրաֆյանը ՀՀ գլխավոր դատախազության Կոռուպցիայի և կազմակերպված հանցագործության դեմ պայքարի վարչության պետ Արմեն Աշրաֆյանի եղբոր աղջիկն է: Այս մեկ տարվա ընթացքում եկել ենք այն եզրակացության, որ մենք չենք վստահում և ոչ մի ղեկավարի: Ելնելով վերագրյալից` դիմում ենք և պահանջում դադարեցնել գործող գյուղապետի գործունեությունը և խափանման միջոց ընտրել կալանքը, քանի որ նա ակնհայտ խոչընդոտում է նախաքննությանը, վկաների վրա ճնշում գործադրելու միջոցով»:
«Ժամանակ» օրաթերթ