«Արցախում մենք հասել ենք ֆենոմենալ հաջողությունների, որովհետև պատրաստվում ենք եվրոպական ներդրումներ կատարել: Ամենայն հավանականությամբ, Արցախում կկառուցվի բնակարանաշինության տարրերի գործարան»,-լրագրողների հետ հանդիպման ժամանակ նշեց Եվրոպայի հայկական միության ֆորումի նախագահ Աշոտ Գրիգորյանը։
Բանախոսը վստահեցրեց, որ մայիսի 8-ին Ղարաբաղում կբացվի եվրոպական և համաշխարհային ամենաբարձր մակարդակի վրա կառուցված հիդրոկայանը. «Հիդրոկայանը կառուցվել է Սարսանգի ջրամբարից հոսող գետի վրա` 6 մգվ և կոչվում է «Թրգի 2»: Կառուցապատման մենեջմենթն ամբողջությամբ իր վրա է վերցրել «Energy Consult Slovakia» ընկերությունը, որի տնօրենը ես եմ, իսկ գլխավոր կապալառուն «ABB Slօvakia» ընկերությունն է: Տուրբինները գնել ենք Չեխիայից, իսկ գեներատորները` Գերմանիայից: Սյունիքի էներգետիկայում կկատարվի մոտ 15 մլն եվրոյի ներդրում։ Ինչ վերաբերում է շինարարությանը, ապա դա կլինի զուտ գործարանի արժեքը` 2մլն և գումարած մյուս ծախսերը: Այսինքն՝ Սյունիքի կտրվածքով մինչ 25մլն եվրո։ Աշխատանքները կսկսվեն մայիս ամսից:
Ղարաբաղում ընդհանուր առմամբ կկառուցվի մոտ 15 հէկ, որից 3-ն արդեն կառուցված են: Նպատակ ունենք կառուցել նաև էներգախնայող նախագծով բնակարաններ»։
Գրիգորյանն անդրադարձավ Արցախի խնդրին, ինչպես նաև Հայաստան-Սլովակիա հարաբերություններին. «Մենք մեր առաջ դրել ենք կարևոր առաջադրանք, որ պետք է կարողանանք գտնել այն թույլ օղակը, որն ունեն եվրոպական երկրները, և այդ թույլ օղակով անցկացնել Ղարաբաղի անկախության առաջին բանաձևը: Այդ հարցում շատ օգտակար աշխատանք է տանում Սլովակիայի մեր լոոբին»:
