«Առաջին լրատվականն» արդեն տեղեկացրել էր, որ ուրբաթ օրը ընդդիմությունը կազմակերպելու է հանրահավաք, որն անվանել է «Հեռացման ուրբաթ»: Ըստ կազմակերպիչների՝ այսօր վերջին օրն էր, երբ Մուբարաքը հնարավորություն ուներ ինքնակամ հրաժարական տալու: Ընդդիմադիրներն այսօր նախատեսում են բազմահազարանոց երթն ուղղել դեպի նախագահական նստավայր:
Քիչ առաջ «Մուսուլման եղբայրներ» կազմակերպությունը հայտարարել է, որ չի պատրաստվում առաջիկա նախագահական ընտրությունների ժամանակ առաջադրել իր թեկնածուին,- հաղորդում է Al-Jazeera հեռուստաընկերությունը: Այս հայտարարությունն այնքանով է կարևոր, որ Մուբարաքն իր չգնալը պայմանավորում էր «Մուսուլման եղբայրների»` իշխանության գալու վտանգով: Հիմա «Եղբայրները» հերթական խնդիրն առաջադրեցին Մուբարաքին` ասելով, թե նա հանգիստ կարող է գնալ թոշակի, քանի որ իրենք չեն ձգտում ամեն կերպ իշխանության գալ:
Այս օրը ընդդիմության համար կարևոր է նաև այն առումով, որ ցույց կտա` արդյոք նրան կհաջողվի՞ այս մի քանի օրերի բախումներից հետո մոբիլիզացնել ուժերը, թե՞ ոչ: Այս պահին հայտնի է, որ նրանք շարունակում են վերահսկել Թահրիր հրապարակը, որտեղից մի քանի օր շարունակ նրանց ուզում էին քշել Մուբարաքի կողմնակիցները:
Ինչպես միշտ, «Առաջին լրատվականն» օնլայն ռեժիմով հետևելու է դեպքերի զարգացմանը և անընդհատ տրամադրելու է ամենավերջին տեղեկությունները:
