Ադրբեջանական Trend լրատվական գործակալության փոխանցմամբ՝ Ադրբեջանի նախագահի աշխատակազմի հասարակական-քաղաքական բաժնի ղեկավար Ալի Հասանովը «Հասարակական կազմակերպությունների դերը քաղաքացիական հասարակության զարգացման մեջ» խորագրով կոնֆերանսի ժամանակ քննադատել է Իրանին.
«Իրանում գոյություն ունի ոչ իրական, կեղծ հոգևորականություն, որը փորձում է Ադրբեջանին մեղադրել իրեն ոչ բնորոշ բաներում: Նրանք համառորեն մեղադրանքներ են ներկայացնում համասեռամոլության վերաբերյալ:
Մենք հերքում ենք դա և իրանական հոգևորականությանն ասում ենք, որ դա ամոթալի է, որ դուք աղոթքներ եք անում, ձեռքերդ վեր եք պարզում բարձրյալին, իսկ մզկիթից դուրս գալուց անմիջապես հետո սկսում եք ստել: Դուք բոլորդ կեղծ եք, ձեր հավատը՝ նույնպես: Մեզ պետք չէ այդպիսի հոգևորականություն:
Մարդը, որը ձեռքերը պարզել է Ալլահին և Ղուրան է ընթերցում, մզկիթից դուրս գալուց հետո չպետք է ստի: Այժմ նրանք ասում են, թե վախեցրին Ադրբեջանին և խանգարեցին Ադրբեջանում գեյ-շքերթի անցկացմանը, որն իբրև թե մենք պլանավորել էինք անցկացնել»:
Հիշեցնենք, որ ավելի վաղ նշվում էր, թե «Եվրատեսիլ 2012»-ի ժամանակ Բաքվում պետք է անցկացվի գեյ-շքերթ:
