«Ընտրական օրենսգրքի» փոփոխություններին վերաբերող մամուլի ասուլիսի ժամանակ ԱԺ ՀՀԿ-ական պատգամավոր Հովհաննես Սահակյանը ասաց, թե փոփոխություններով նախատեսված է, որ ցանկացած վստահված անձ կամ քաղաքական ուժ, որը ցանկություն կունենան նկարահանել ընտրական գործընթացը, կարող է դա անել: «Եթե կա տեսաձայնագրություն, դա կարող է ծառայել որպես ապացուցողական հիմք»,- նշեց նա:
ՀՀԿ-ական պատգամավորը տեղեկացրեց, որ «Ընտրական օրենսգրքի» փոփոխություններից հետո նախընտրական քարոզչական պլակատները համամասնությամբ կարող են տեղադրել բոլոր այն քաղաքական ուժերը, որոնք դրա ցանկությունը կունենան:
Հմայակ Հովհաննիսյանը նկատեց, որ Հայ ազգային կոնգրեսը առաջարկել էր ընտրությունների կազմակերպման ամբողջ պատասխանատվությունը դնել պետության վրա, և բոլոր մակարդակների ընտրական հանձնաժողովները ձևավորել պետության կողմից: Հմայակ Հովհաննիսյանը հիշեցրեց, որ պատասխանատվության մասնատումը հանգեցնում է անպատասխանատվության: «Վերին օղակը ձևավորվել է պետության կողմից, իսկ ստորին օղակները ձևավորվել է կուսակցությունների միջոցով, այն էլ՝ միայն խորհրդարանական. չի՞ նշանակում պատասխանատվության տարրալուծում: Սա կարևոր հարց է, կարծում եմ, բոլորդ կհամաձայնեք»,- ասաց Հմայակ Հովհաննիսյանը: ՀՀԿ-ական պատգամավոր Հովհաննես Սահակյանը կարծիք հայտնեց, որ հարյուր տոկոսանոց համամասնական ընտրակարգին իրենք դեմ են, քանի որ Հայաստանի հեռավոր գյուղերի բնակիչները չեն կարող ճանաչել կուսակցությունները և կողմնորոշվել նրանց ծրագրերով: «Հեռուստատեսությունն ազատականացրեք, թող տեսնեն»,- նետեց «Ժառանգություն» խմբակցության պատգամավոր Արմեն Մարտիրոսյանը:
