Իրանական Mehr News լրատվական գործակալության փոխանցմամբ՝ «Վեցնյակի» երկրները պետք է միմյանց հետ խորհրդակցություններ անցկացնեն նախքան Իրանի միջուկային ծրագրի վերաբերյալ բանակցային հաջորդ փուլի անցկացումը: Այս մասին հայտարարել է Իրանի գերագույն ղեկավար ու հոգևոր առաջնորդ, այաթոլլահ Ալի Խամենեիի խորհրդական Ալի Աքբար Վելայաթին.
««Վեցնյակի» երկրները պետք է Մոսկվա ժամանեն ավելի նախապատրաստված ձևով, քան Բաղդադի պարագայում էր, որտեղ այդ երկրների ներկայացուցիչներն ավելի շատ դիմում էին միմյանց, քան՝ Իրանին: Մոսկվայում բանակցային հաջորդ փուլի անցկացման շուրջ պայմանավորվածության հանգելը վկայում է, որ կողմերը ցանկանում են լուծել միջուկային խնդիրը: «Վեցնյակի» երկրները պետք է հարգեն Միջուկային զենքի չտարածման պայմանագրի շրջանակներում Իրանի իրավունքները և պետք է ցույց տան դա: Իրանը չի պատրաստվում հրաժարվել խաղաղ նպատակներով ուրանի հարստացումից»:
Հիշեցնենք, որ Իրանի ու «Վեցնյակի» երկրների միջև Իրանի միջուկային ծրագրի շուրջ բանակցային վերջին փուլը տեղի է ունեցել մայիսի 23-24-ը՝ Բաղդադում, որտեղ կողմերը պայմանավորվել են հաջորդ անգամ հանդիպել հունիսի 18-19-ը՝ Մոսկվայում: