Leonie Industries ընկերության համասեփականատերը` Կամիլ Շիդյակը, որն զբաղվում է ԱՄՆ պաշտպանության նախարարության քարոզարշավով, խոստովանել է համացանցում USA Today-ի լրագրողներին վարկաբեկելու մտադրության մասին:
Այս մասին հայտնում է USA Today պարբերականը:
USA Today-ի թղթակից Թոմ Վանդեն Բրուկն ու խմբագիր Ռեյ Լոկերը 2012թ. փետրվարին հրատարակել էին հոդված, որտեղ հայտնում էին, որ Պենտագոնը հարյուրավոր միլիոն դոլար է վճարել մասնավոր կապալառուներին Իրաքում ու Աֆղանստանում քարոզարշավի իրականացման համար:
Մասնավորապես, 2005-2009թթ. քարոզչության վրա ծախսերն ավելացել են` տարեկան 9 մլն դոլարից հանսելով 508 մլն-ի: Հետաքննության ընթացքում լրագրողները պարզել էին նաև, որ կապալառու ընկերություններից մեկը` Leonie Industries-ը, պետությանը չի վճարել 4 մլն դոլարի հարկ: Ընդ որում` ընկերությունը 2009-ից Պենտագոնից ստացել է ավելի քան 120 մլն դոլար:
Հոդվածի հրապարակումից հետո համացանցում սկսեցին հայտնվել կեղծ օգտահաշիվներ ու կայքեր Թոմ Վանդեն Բրուկի ու Ռեյ Լոկերի անունով: Բլոգներում ու կայքերում անծանոթ մարդիկ թողնում էին լրագրողների աշխատանքը վարկաբեկող մեկնաբանություններ: Լրագրողներն այն ժամանակ հայտարարել էին, որ իրենց վարկաբեկելու արշավ է սկսվել: Պենտագոնը հերքում էր իր մասնակցությունն այդ ամենին:
Մայիսի 24-ին Շիդյակը հայտարարություն տարածեց, որտեղ իր վրա վերցրեց ամբողջ պատասխանատվությունը վերջիններիս նկատմամաբ իրականացված արշավի համար ասելով, որ դրա համար վճարել է իր սեփական միջոցներից:
Նա ափսոսանք է հայտել, որ իր գործողությունները վտանգել են Leonie Industries-ի ու ԱՄՆ պաշտպանության նախարարության վարկանիշը:
Շիդյակն իր գործողությունները բացատրել է նրանով, որ իր ընկերության հարկային դժվարությունների մասին USA Today-ի ռեպորտաժը վրդովել է իրեն:
ԱՄՆ պաշտպանության նախարարությունը հանդես է եկել համապատասխան հայտարարությամբ` դատապարտելով Շիդյակի գործողությունները:
