Տեխասում սկսվել է ԱՄՆ բանակի զինվոր Նասեր Ջեյսոնի Աբդոյի գործով դատավարությունը, ով մեղադրվում է իր զինակիցների դեմ ահաբեկչություն նախապատրաստելու մեջ: Ինչպես հաղորդում է Associated Press-ը, մեղավոր ճանաչվելու դեպքում նրան սպասվում է ցմահ ազատազրկում:
Հետաքննության տվյալներով՝ նա տնային պայմաններում ռումբեր է պատրաստել՝ օգտվելով «Ալ-Կաիդա»-ի անգլալեզու ամսագրում հրապարակված հրահանգներից: Դատախազների ենթադրությամբ՝ Աբդոյի մոտ գործնականում ամեն ինչ պատրաստ էր հարձակումն իրականացնելու համար, նա ձերբակալվել է ահաբեկչության իրականացումից մի քանի ժամ առաջ:
Մեղադրյալի փաստաբանները պնդում են, որ իրենց պաշտպանյալի մոտ ոչ մի գործող նռնակ չի հայտնաբերվել, իսկ «կառավարությունը ոչ մի կերպ չի կարող շրջանցել այդ փաստը»:
Մեղադրող կողմի վկաները՝ FBI գործակալ Մայքլ Օուենսն իր հերթին հայտարարել է, որ հարցաքննությունների ժամանակ Աբդոն ասել է, որ երազում է հանուն հավատի նահատակվել և պատրաստվում է հետևել ամերիկյան բանակի մայոր Նիդալ Հասանի օրինակին, ով 2009 թ. նոյեմբերին Տեխասի Ֆորթ Հուդ ռազմաբազայում սպանել էր 13 մարդու: Աբդոն պատրաստվում էր ահաբեկչություն իրականացնել նույն տեղում:
Դատախազների պնդմամբ՝ նա պատրաստվում էր ռումբեր տեղադրել այն վայրերում, որտեղ ավելի շատ էին զինվորներ և սպաներ լինում, մասնավորապես՝ Ֆորթ Հուդի սրճարաններում և ռեստորաններում:
Ենթադրյալ ահաբեկչի գործողությունների դրդապատճառը, ըստ մեղադրող կողմի, եղել է «Իրաքի և Աֆղանստանի ժողովրդի համար վրեժը»:
Աբդոն ծառայել է Ֆորթ Քեմբելի դեսանտայինների բազայում: 2011 թ. հուլիսին նա լքել է այն՝ առանց հարգելի պատճառ ներկայացնելու: Դրանից մի քանի շաբաթ անց՝ հուլիսի 27-ին ենթադրյալ ահաբեկիչը ձերբակալվել է:
Աբդոն ԱՄՆ-ի քաղաքացի է, ծագումով Պաղեստինից: Դեռ նախքան իր ձերբակալությունը նա մի քանի անգամ հրաժարվել է ծառայության մեկնել Աֆղանստան՝ հայտարարելով, որ չի կարող կրակել հավատակիցների վրա: