Ադրբեջանական APA լրատվական գործակալության փոխանցմամբ՝ Ադրբեջանի ԱԳՆ-ի մամլո ծառայության ղեկավար Էլման Աբդուլաևը լրագրողների հետ զրույցում հայտարարել է, որ Իրանը «նախանձում է» Ադրբեջանին.
«Դժբախտաբար, Ադրբեջանում այնպիսի մրցույթի անցկացումը, ինչպիսին որ «Եվրատեսիլն» է, ոմանց մոտ, այդ թվում՝ նաև Իրանում, առաջացնում է նախանձի զգացում: Դրան ներկա գտնվելու համար մեծ թվով օտարազգիներ, այդ թվում՝ նաև Իրանի քաղաքացիներ են ժամանել Ադրբեջան: Իրանում որոշակի խառնաշփոթ է տիրում:
Ադրբեջանում Իրանի դիվանագիտական ներկայացուցչությունը հայտարարել է, որ դեսպանը հետ է կանչվել Թեհրան՝ կապված սովորական խորհրդակցությունների հետ: Միևնույն ժամանակ մի շարք ԶԼՄ-ներ նշում են, որ դեսպանի հետկանչը Թեհրան հանդիսանում է որոշակի արձագանքի արդյունք: Այսինքն՝ բուն Իրանում տվյալ խնդրի շուրջ տիրում է անորոշություն, և մի շարք ուժեր չեն կարողանում որոշել, թե ինչով է պայմանավորված դեսպանի հետկանչը Թեհրան»:
Հիշեցնենք, որ այսօր տեղի է ունենալու «Եվրատեսիլի» առաջին կիսաեզրափակիչը:
