Իրանական ISNA լրատվական գործակալության փոխանցմամբ՝ ԱԷՄԳի գլխավոր տնօրեն Յուկիա Ամանոն Թեհրանում հանդիպումներ է ունեցել Իրանի անվտանգության գերագույն խորհրդի գլխավոր քարտուղար և Իրանի միջուկային ծրագրի հարցում գլխավոր բանագնաց Սաիդ Ջալիլիի և Իրանի Ատոմային էներգիայի կազմակերպության (ԻԱԷԿ) ղեկավար Ֆերեյդուն Աբբասիի հետ:
Այդ հանդիպումներում կողմերը քննարկել են Իրանի միջուկային ծրագրի հարցը և մասնավորապես ԻԱԷԿ-ի ծավալած գործունեությունը գյուղատնտեսական, բժշկական ու արդյունաբերական ոլորտներում: Կողմերն ընդգծել են ԱԷՄԳ-ի ու ԻԱԷԿ-ի միջև ավելի սերտ հարաբերություններ հաստատելու անհրաժեշտությունը:
Ամանոն վստահություն է հայտնել, որ զարգացում է ապրելու ԱԷՄԳ-ի ու ԻԱԷԿ-ի միջև համագործակցությունը՝ ընդգծելով, որ ԱԷՄԳ-ի պարտականությունների մեջ է մտնում ոչ միայն ստուգումներ անցկացնելը, այլև քաղցկեղի դեմ պայքարի, միջուկային ու սննդամթերքային անվտանգության, ջրային պաշարների և այլ խնդիրների շուրջ համագործակցության զարգացումը:
