Քիչ առաջ տարբեր կայքերում հայտնվեցին տեղեկություններ, համաձայն որոնց` մի քանի օր առաջ նշանակված փոխնախագահ Օմար Սուլեյմանը գործող նախագահ Հոսնի Մուբարաքին առաջարկել է հրաժարվել պաշտոնից, որպեսզի հնարավոր լինի հաղթահարել քաղաքական ճգնաժամը երկրի ներսում: Բոլորը հղում են անում եգիպտական Al-Shuruq թերթին:
Ըստ թերթի` Օմար Սուլեյմանի առաջարկների մեջ է մտնում նաև հրաժարումը երկրի ղեկավարի պաշտոնի ժառանգական փոխանցումից, գործարարների պարտադիր բացակայությունը կառավարության կազմում, ինչպես նաև փոփոխություններն իշխող Ազգային ժողովրդավարական կուսակցության կազմում:
Այն, որ այսօրինակ նախագիծ կարող է լինել, դժվար է հերքել կամ հաստատել:
Եթե հաշվի առնենք, որ Al-Shuruq թերթը երբեմն կառավարական հերքումներ կամ հաստատումներ է հրապարակում, կարելի է պնդել, որ սա, հնարավոր է, իշխանությունների` ստեղծված իրավիճակից դուրս գալու միակ որոշումն է:
Սակայն դժվար է ասել, որ այս քայլով իշխանությունները կկարողանան սիրաշահել փողոցներ դուրս եկած ցուցարարներին, քանի որ Սուլեյմանը Մուբարաքի թիմի հիմնական անդամներից էր, իսկ դա նշանակում է, որ ցուցարարները չեն կարող հասնել իրենց պահանջների իրականացմանը թեկուզ և նոր, բայց նույնքան հին Օմար Սուլեյմանի օրոք:
