Ձմռան ամիսներին հատուկ ուշադրության և խնամքի կարիք ունեն նաև մեր վարսերը:
Ձմռան շրջանում մազերը մի քանի «թշնամի» ունեն` քամին, ցուրտ օդը, թաց ձյունը, նույնիսկ սովորական ջուրը կարող է վնասել մազերը:
Մասնագետները խորհուրդ են տալիս անպայման գլխարկ կրել և խուսափել վարսահարդարիչի ամենօրյա օգտագործումից:
«Մազարմատները սնուցվում են նյարդաթելերով, և ես խորհուրդ եմ տալիս պարզապես չնյարդայնանալ, օգտագործել ավելի ամրացնող դիմակներ և այնպիսի շամպուններ, որոնց մեջ բնական բաղադրությունները շատ են:
Մազերը պետք է լվանալ երեք օրը մեկ և վարսահարդարիչն էլ օգտագործել ոչ շատ հաճախ»,-«Առաջին լրատվականի» հետ զրույցում նշեց վարսահարդար-ոճաբան Անժելա Սարգսյանը:
Անժելան խորհուրդ տվեց տնային պայմաններում օգտագործել սնուցող և մազարմատներն ամրացնող դիմակներ. մազերի ծայրերի համար օգտագործել բողկի յուղ, թողնել 10-15 րոպե և լվանալ:
Կարևոր է նաև մազարմատների ամրացումը, ինչի համար պետք է մեկ բաժակ կարմիր, ոչ քաղցր գինու մեջ դնել մեկ գլուխ սոխ (սոխը նախապես մաքրել և կիսել), պահել մեկ ժամ և քսել ոչ մաքուր մազերին` մերսելով արմատները: Կապել պոլիէթիլենային տոպրակով և թողնել մեկ ժամ, այնուհետև լվանալ. խորհուրդ է տալիս վարսահարդարը:
