Հոլանդիայի մասնագետները վստահեցնում են, որ շատ շուտով արևմտյան երկրների բնակիչներն իրենց սննդակարգում կօգտագործեն տարատեսակ միջատներ, որոնք Արևելյան խոհանոցում վաղուց արդեն համարվում են լավագույն դելիկատեսներից մեկը:
Վագենինգենի համալսարանի պրոֆեսոր Առնոլդ Վան Հույիսը հրավիրելով շուրջ 200 կամավորների` նրանց հյուրասիրել է անսովոր սնունդ. միջատներով բուլկիներ, մարինացված մորեխներով ռուլետներ և ճիճուներ` շոկոլադով: Մասնակիցները, որոնց թվում շատ կանայք կային, նշել են, որ նմանատիպ սնունդը շատ համեղ է:
Պրոֆեսորի հավաստմամբ, հենց միջատներով պատրաստված սնունդը ապագա ունի, որոնց միսը իր կալորիականությամբ չի զիջում տավարի և խոզի մսին:
Միջատների միսը չի պարունակում վնասակար ճարպեր, որոնք բարձրացնում են խոլեստերինի մակարդակը և ավելացնում աթերոսկլերոզի առաջացման հավանականությունը:
Պրոֆեսորը և իր գիտնական կոլեգաները նշում են, որ Եվրոպայում տարեցտարի բարձրանում է ընտանի կենդանիների մսի գինը, և հեռու չէ այն օրը, երբ սովորական մսով սենդվիչը կարժենա 120 եվրո, իսկ ավելի օգտակար և ոչ պակաս համեղ մորեխներով բուլկին 10 անգամ էժան կլինի:
