Կարինե Դավոյանը մինչև 2008 թ.-ի մարտիմեկյան դեպքերը դասավանդում էր ՌԴ տուրիզմի պետական համալսարանի երևանյան մասնաճյուղում: Նրան աշխատանքից հեռացրին իր ընդդիմադիր հայացքների և քաղաքացիական հստակ դիրքորոշում արտահայտելու համար:
Կարինեն ակտիվորեն մասնակցում է Հայ ազգային կոնգրեսի հրավիրած բոլոր հանրահավաքներին ու ակցիաներին: Փետրվարի 18-ին Հայ ազգային կոնգրեսը հրավիրում է հանրահավաք: Ի՞նչ ակնկալիքներ ունի Կարինե Դավոյանը ՀԱԿ-ի հրավիրած հանրահավաքից:
«Ակնկալում եմ, որ ՀԱԿ-ի հրավիրած հանրահավաքում առաջին հերթին արծարծվեն սոցիալական հարցերը, խոսեն թանկացումների մասին, քանի որ դրանցից ամենաշատը տուժեց շարքային քաղաքացին:
Այդ թանկացումներն արդարացված չեն և հարվածում են առաջին հերթին սոցիալապես անապահով խավին: Հասկանալի է, որ այդ ամենը ծառայում է օլիգարխիկ խմբերին ու նրանց շահերին»,- ասաց մեր զրուցակիցը:
Կարինե Դավոյանն ասաց, որ ինքն ակնկալում է, որ ՀՀ քաղաքացիները ընդդիմության հանրահավաքներին մասնակցեն ոչ թե միայն սոցիալապես անապահով վիճակից ելնելով, այլ` քաղաքացիական գիտակցություն ցուցաբերելով:
«Ոչ թե պետք է ընդվզել միայն այն ժամանակ, երբ քեզ պատկանող հեռուստաալիքը փակում են կամ քեզ զրկում են օրվա հաց վաստակելու հնարավորությունից, կամ երբ քո մերձավորն իր քաղաքական հայացքների համար ազատազրկվում է, այլ` պետք է պայքարել, որ մեր երկրում էլ ձևավորվի քաղաքացիական հասարակություն»,- ասաց Կարինե Դավոյանը:
Կարինեն հիշեց, թե ինչպես ԱՄՆ մի դիվանագետի հետ զրույցի ժամանակ ինքն ասել է. «Ձեր բախտը բերել է, քանի որ Դուք ժառանգել եք ժողովրդավարական արժեքներ և վայելում եք դրա պտուղները»:
Իսկ դիվանագետը ՀՀ քաղաքացուն հակադարձել է, թե այդ արժեքները պահպանելն ավելի հեշտ չէ, քան` դրանց համար պայքարելը: «Եթե մենք մի փոքր կորցնենք զգոնությունը, ապա հեշտությամբ կկորցնենք նաև այդ արժեքները»,- ասել է ԱՄՆ դիվանագետը:
