Օրգանիզմում ճարպային շերտը հաստանում է ավելի արագ, քան նախկինում ենթադրվում էր: Ճարպը սկսում է կուտակվել առատ սնունդն ընդունելուց մի քանի ժամ անց: Ինչպես գրում է Daily Mail-ը, նման եզրահանգման են եկել Օքսֆորդի համալսարանի գիտնականները՝ դիետոլոգիայի պրոֆեսոր Ֆրեդերիկ Կարպի գլխավորությամբ:
Նախկինում մասնագետները կարծում էին, որ ճարպային հյուսվածքի հաստացումը կատարվում է աստիճանաբար՝ օր առ օր, սակայն հետազոտությունների արդյունքում պարզ է դարձել, որ եթե սննդից ստացված էներգիան գերազանցում է օրգանիզմի ծախսած էներգիային, ապա ճաշից 3-4 ժամ հետո գոտկատեղի և ազդրերի հատվածում սկսում է ճարպ հավաքվել:
Կարպի խոսքով՝ չափավոր սնվելու դեպքում, հավաքված ճարպը օրգանիզմի կողմից կծախսվի, սակայն սննդի չարաշահման հետևանքով ճարպակալման վտանգը մեծ է: «Ճարպաշերտը կհաստանա ոչ թե օրերի, այլ ժամերի ընթացքում»,-ասել է պրոֆեսորը: