Թուրքական Sabah թերթի փոխանցմամբ՝ Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) զինյալները Դիարբեքիրի նահանգի Քուլփ շրջանում առևանգել են իշխող «Արդարություն ու զարգացում» կուսակցությանը (ԱԶԿ) տվյալ շրջանի ղեկավար Վեյսել Չելիքին:
Դեպքը տեղի է ունեցել այն ժամանակ, երբ Չելիքը երեկ կեսօրին Մուշից վերադառնալիս է եղել Քուլփ: Ճանապարհին նրա ավտոմեքենան կանգնեցրել են PKK-ի զինյալները և առևանգել են նրան: Նշվում է, որ քուրդ զինյալները երկու ժամ շարունակ փակել էին այդ ճանապարհը և սպասել Չելիքի հայտնվելուն:
PKK-ականները խոստացել են ձեռք չտալ Չելիքին՝ ընդգծելով, որ պարզապես մի քանի օրով նրան հյուրընկալում են իրենց մոտ: Թուրքական թերթը հիշեցնում է, որ նախորդ տարի էլ PKK-ն նման կերպ առևանգել էր շրջաններից մեկի ղեկավարին և նրան ուղեկցող 3 զինվորականի ու 1 ոստիկանի, և առևանգված այդ 5 անձինք ցայժմ դեռ ազատ չեն արձակվել:
