Իրանական Press TV-ի փոխանցմամբ՝ Իրանը կառուցելու է Մերձավոր Արևելքի առաջին ստորգետնյա գազապահեստը: Այս մասին հայտարարել է Իրանի բնական գազի պահպանման ընկերության (Natural Gas Storage Company) գործադիր տնօրեն Մասուդ Սամիվանդը:
Վերջինիս խոսքերով՝ ստորգետնյա գազապահեստը կառուցվելու է Նասրաբադ շրջանի Քաշան քաղաքի մոտ: Նախնական գնահատականներով՝ այդ գազապահեստը կարող է ամբարել 3-4.5 միլիարդ խորանարդ մետր բնական գազ:
Սամիվանդը հավելել է, որ ապագա գազապահեստի տեղանքում ավարտվել են երկրաբանական հետազոտությունները և մոտ ապագայում կսկսվեն դրա կառուցման աշխատանքները: Նա չի բացառել, որ գազապահեստի կառուցման աշխատանքները կարող են սկսվել արդեն մայիսի վերջին:
Իրանի իշխանությունների պլանի համաձայն՝ մինչև 2015 թվականը երկրի գազապահեստների հզորությունը պետք է հասցվի ավելի քան 14 միլիարդ խորանարդ մետրի: