Անդամալույծ բրիտանուհին համակարգչով կառավարվող հատուկ ռոբոտացված հագուստի շնորհիվ անցել է մարաթոնը:
Ինչպես հաղորդում է բրիտանական The Daily Mail-ը, 32-ամյա Քլեր Լոմասը Բուկինգհեմյան պալատի Մել փողոցի մոտ երեքշաբթի անցել է իր մարաթոնը: 42 կմ 195 մետր երկարությամբ տարածությունը հաղթահարելու համար նրանից պահանջվել է 16 օր, որի ընթացքում նա դանդաղ, ընդմիջումներով շարժվել է Լոնդոնի փողոցներով: Նրան ուղեկցել են ամուսինը՝ Դենը, 13-ամյա դուստրը՝ Մեյզին, և մի խումբ աջակիցներ տարբեր բարեգործական կազմակերպություններից:
Բուկինգհեմյան պալատի մոտ կնոջը դիմավորել է թագավորի ձիավորների գվարդիայի պատվո պահակազորը, հարյուրավոր լոնդոնցիներ, որոնք եկել էին հատուկ այդ իրադարձության համար: Նրանց թվում է եղել Հոլի Բրենսոնը՝ Virgine խմբի սեփականատեր Ռիչարդ Բրենսոնի դուստրը: Նա Քլերին հանձնել է Virgin Trophy-ի գավաթ, որը տրվում է չափազանց շատ համբերատարություն ցուցաբերած մարզիկներին:
Քլերն իր մարաթոնը սկսել է ապրիլի 22-ին լոնդոնյան մարաթոնի 36 հազար մասնակիցների հետ: Մարաթոնի կազմակերպիչները հայտարարտել են, որ Քլերին չի տրվի մեդալ, որը սահմանված է մյուս մասնակիցների համար: Այն տրվում է միայն նրանց, ովքեր տարածությունը հաղթահարում են մեկ օրում: Սակայն մարաթոնի 12 անդամներ Քլերին են նվիրել իրենց մեդալները՝ իրենց հիացմունքն արտահայտելով նրա կամքի ուժի համար:
Մարաթոնին իր մասնակցությամբ Քլեր Լոմասը ցանկանում էր ուշադրություն հրավիրել անդամալույծների վրա և միջոցներ հավաքել բարեգործության համար: Լոնդոնի փողոցներով իր «ճամփորդության» ընթացքում նա օգնել է հավաքել 86 հազար ֆունտ (140 հազար դոլար) Spinal research կազմակերպության համար, որը ֆինանսավորում է անդամալույծներին օգնելու համար տարվող գիտական հետազոտությունները:
2007 թ. մասնագիտությամբ ոսկյա զարդերի դիզայներ Քլեր Լոմասը ընկել էր ձիուց և ողնաշարի ծանր վննասվածք ստացել, որի հետևանքով կրծքավանդակից ներքև անդամալույծ էր դարձել: