Ադրբեջանական Salam News գործակալությանը տված հարցազրույցի ժամանակ Ադրբեջանի նախկին նախագահ Այազ Մութալիբովն անդրադարձել է Շուշիի կորստին.
«Իմ նախագահության ժամանակ Շուշին այնպես էր ամրացվել, որ ոչ ոք չէր կարող ռազմական ներխուժման միջոցով գրավել այդ քաղաքը: Միայն մարդկանց դավաճանությամբ կարելի էր հանձնել այդ քաղաքը: Դրա համար էլ ես ցավով եմ խոսում Շուշիի կորստյան մասին: Սխալներն ու սխալ հաշվարկներն արվում են հեշտությամբ, սակայն շատ դժվար են ուղղվում:
Տեսեք, անցել է 20 տարի և չի հաջողվել լուծել խնդրի ոչ ուժային իրական ուղիները: Այսօր էլ շարունակվում է փոխզիջումների անվերջ փնտրտուքը, որոնք դեռ գոյություն չունեն: Միջազգային հանրությունն այսօր հանդես է գալիս պատերազմի դեմ, ինչի համար էլ կարելի է անվերջ փնտրել խնդրի կարգավորման ուղիներ: Ոչ մի ադրբեջանցի, ոչ մի պետության ղեկավար չի ստորագրի Լեռնային Ղարաբաղի վերաբերյալ նվաստացուցիչ պայմանագրի տակ»:
Հիշեցնենք, որ Լեռնային Ղարաբաղում ադրբեջանական բանակի մի շարք անհաջողություններից և Ադրբեջանի ժողովրդական ճակատի ճնշումներից հետո Մութալիբովը հրաժարական տվեց 1992 թվականի մարտի 6-ին։ Նույն թվականի մայիսի 14-ին նրան հաջողվել էր 4 օրով վերադառնալ իր պաշտոնին: Դրանից հետո նա քաղաքական ապաստան գտավ Ռուսաստանում, իսկ Ադրբեջանում նրա դեմ հարուցեցին քրեական գործ։ Սակայն ռուսական կողմը հրաժարվեց նրան հանձնել Ադրբեջանին։
2011 թվականի օգոստոսի 8-ին Մութալիբովը 19-ամյա ընդմիջումից հետո վերադարձավ Ադրբեջան՝ մասնակցելու համար իր ավագ որդու թաղման արարողությանը և մնաց այնտեղ։ Ապա Ադրբեջանի խորհրդարանն ընդունեց նախկին նախագահներին անձեռնմխելիություն շնորհող օրինագիծը։
