Չնայած որ Յալթայի գագաթնաժողովը չեղյալ է հայտարարվել, Լիտվայի նախագահ Դալյա Գրիբաուսկայտեն ուրբաթ օրը կմեկնի Ուկրաինա, որտեղ նա նախատեսում է հանդիպել Ուկրաինայի նախկին վարչապետ, բանտարկության մեջ գտնվող Յուլյա Տիմոշենկոյի հետ: Այս մասին RIA Novosti-ին այսօր հայտնել է Լիտվայի նախագահի խորհրդական Դայվա Ուլբինայտեն:
Հիշեցնենք, որ Ուկրաինան այսօր` մայիսի 8-ին, հայտարարել է Կենտրոնական Եվրոպայի երկրների գագաթնաժողովը հետաձգելու մասին: Պատճառը մի շարք եվրոպական պետությունների ղեկավարների հրաժարվելն էր գագաթնաժողովին մասնակցելուց` կապված Յուլյա Տիմոշենկոյի շուրջ ստեղծված իրավիճակի հետ:
«Նախագահը կգնա Յալթայի հանդիպմանը, որը տեղի կունենա փոքր ձևաչափով, ոչ թե 17 պետությունների, ինչպես նախատեսված էր, այլ՝ 5»,- ասել է Ուլբինայտեն:
«Այցի ճշգրիտ ծրագիր դեռ չկա, վաղն արդեն կլինի: Սակայն Տիմոշենկոյի հետ հանդիպում այնտեղ անպայման կլինի»,- ասել է նա:
Հիշեցնենք, որ Ուկրաինայի ԱԳՆ ղեկավարի մամլո քարտուղար Ալեքսանդր Դիկուսարովն այսօր ասել էր, որ Ուկրաինան անհրաժեշտ է համարում հետաձգել համագումարը և այն չանցկացնել մայիսի 11-12-ը:
Գերմանիայի, Էստոնիայի, Չեխիայի, Ավստրիայի և Իտալիայի առաջնորդները հայտարարել էին, որ չեն մասնակցի գագաթնաժողովին՝ Յուլյա Տիմոշենկոյին ազատազրկության մեջ պահելու պատճառով։
