Խորհրդարանի ընտրության պաշտոնական տվյալներով, անհաջողության մատնված քաղաքական ուժերը երեկ յուրօրինակ լռության օր էին հայտարարել: Այսօր նրանցից առնվազն մեկը կխոսի: Խոսքը Հայ ազգային կոնգրեսի մասին է, որը երեկոյան հանրահավաք է անցկացնելու և գնահատելով ընտրությունները` խոսելու է հետագա անելիքների մասին: Հետաքրքրական է, թե արդյոք մինչև Հայ ազգային կոնգրեսի հանրահավաքը որևէ բան կխոսի Բարգավաճ Հայաստան կուսակցությունը: Եթե ԲՀԿ-ն միանում է Կոնգրեսին, ապա այդ երկու ուժերի հետընտրական բողոքը կարող է իսկապես լուրջ խնդիրներ առաջացնել ՀՀԿ համար, առավել ևս, եթե այդ երկու ուժերին միանա նաև ՀՅԴ-ն: Եվ ամբողջ խնդիրը այստեղ հենց այն է, թե արդյոք ինչպիսի դիրքորոշում է ունենալու Բարգավաճ Հայաստանը:
Եթե ԲՀԿ դիրքորոշումը ուշանա, ապա Հայ ազգային կոնգրեսն ամենայն հավանականությամբ ձեռնպահ կմնա ակտիվ փողոցային պայքարից, քանի որ Կոնգրեսը ներկայումս չունի բավարար հասարակական աջակցություն փողոցից իշխանության վրա լուրջ ճնշում բանեցնելու համար: Ակնհայտ է, որ Բարգավաճ Հայաստանի դիրքորոշումը պայմանավորված է լինելու ՀՀԿ հետ բանակցության արդյունքից, ինչը նշանակում է, որ ԲՀԿ-ն երևի թե դեռ մի քանի օր կշարունակի լռությունը կամ կխուսափի կոնկրետ անելիքների մասին խոսելուց, բավարարվելով որոշակի գնահատականներով: Միևնույն ժամանակ, կասկած չկա, որ Բարգավաճ Հայաստանն ինչ-որ ձևերով կշարունակի հարաբերությունները Կոնգրեսի հետ: Եվ դա, ըստ էության, ձեռնտու է նաև ՀՀԿ-ին, եթե, իհարկե, հնարավոր լինի ԲՀԿ հետ պայմանավորվել նոր ստատուս քվոյի պայմաններում խաղի նոր կանոնների շուրջ:
Բանն այն է, որ ՀՀԿ համար այդ դեպքում ձեռնտու կլինի ԲՀԿ-Կոնգրես ձևաչափի պահպանությունը ինչ-որ դրսևորմամբ, քանի որ այդպիսով Բարգավաճ Հայաստանի միջոցով ՀՀԿ-ն կարողանում է վերահսկել նաև այդ տիրույթը: Իսկ կարո՞ղ է արդյոք Բարգավաճ Հայաստանը արմատական հակադրության մեջ մտնել ՀՀԿ հետ և առանց նժդեհականների հետ պայմանավորվելու պարզապես անցնել արդեն ակտիվ փողոցային պայքարի: Տեսականում, անշուշտ, կարող է, սակայն խնդիրն այն է, որ եթե ԲՀԿ-ն պատրաստ և ունակ լիներ այդպիսի պայքարի, ապա թերևս խորհրդարանի ընտրության ընթացքում արդեն իսկ այդ պայքարը կհակադրեր ՀՀԿ-ին և թույլ չէր տա, որպեսզի Հանրապետականը նման ցուցանիշ գրանցեր սեփական անվան դիմաց և ըստ էության էլ ավելի մեծացներ իր մենիշխանությունը խորհրդարանում:
Եթե Բարգավաճը դա չկարողացավ անել ընտրության ընթացքում, ապա մեղմ ասած քիչ հավանական է, որ նման բան կարողանա անել ընտրությունից հետո և արմատական հակադրության մեջ մտնել ՀՀԿ հետ, առավել ևս, որ ՀՀԿ-ն արդեն իսկ ստացել է ընտրական արդյունքի միջազգային հավանությունը: Ինչ վերաբերում է հասարակական հավանությանը, ապա այստեղ իրավիճակը, մեղմ ասած, հարաբերական է, քանի որ մտածող հասարակության համար, մեղմ ասած, տարօրինակ է ժողովրդավարության և օրինականության համար պայքարը ԲՀԿ առաջնորդությամբ, հատկապես այն ամենից հետո, ինչ ՀՀԿ հետ զուգահեռ կատարում էր ԲՀԿ-ն ընտրության ամբողջ գործընթացում:
Լուսանկարը՝ PanARMENIAN Photo-ի
