Գերմանիայի կանցլեր Անգելա Մերկելը և նախօրեին Ֆրանսիայի նախագահական ընտրություններում հաղթած Ֆրանսուա Օլանդը հավանաբար կհանդիպեն մայիսի 15-ին: Այս մասին հաղորդում է DPA գործակալությունը: Այդ օրը Ֆրանսիայում տեղի կունենա իշխանության փոխանցում գործող նախագահ Նիկոլա Սարկոզիից ընտրված նախագահին:
Գերմանիայի կառավարության պաշտոնական ներկայացուցիչ Շտեֆան Զայբերտը երկուշաբթի հայտարարել է, որ հանդիպումը շուտ տեղի կունենա, սակայն որոշակի օր չի նշել:
«Ակնհայտ է, որ սերտ ֆրանս-գերմանական համագործակցությունը ընթանալու է նաև կանցլերի և Օլանդի միջև»,- հայտարարել է Զայբերտը:
Ֆրանսուա Օլանդը ստացել է ձայների 51,62%-ը, իսկ նրա հակառակորդ Նիկոլա Սարկոզին` 48,38%-ը: Ընդհանուր առմամբ, Ֆրանսիայի նախագահական ընտրություններին մասնակցել է ընտրելու իրավունք ունեցեղ քաղաքացիների 80,34%-ը:
Օլանդը դարձել է երկրորդ սոցիալիստը, որը զբաղեցնում է այս պաշտոնը: Առաջինը Ֆրանսուա Միտերանն էր:
