Հայաստանում մեկնարկել են Ազգային ժողովի ընտրությունները, որոնց ընթացքում կընտրվեն Ազգային ժողովի 131 պատգամավորներ, որոնցից 90-ը` համամասնական, 41-ը` մեծամասնական ընտրակարգով:
Ողջ հանրապետությունում ժամը 8:00-ին բացվել է 1982 ընտրատեղամաս:
Մինչև ժամը 20:00-ը գրանցված 2.484.003 ընտրողները կկարողանան քվեարկել ընտրությունների մասնակից քաղաքական ուժերի, ինչպես նաև մեծամասնական ընտրակարգով առաջադրված թեկնածուների օգտին:
Հայաստանում ընտրություններին հետևելու են 647 միջազգային և 31 հազար տեղական դիտորդներ, ինչը հայկական ընտրությունների համար աննախադեպ թիվ է: Ինչ վերաբերում է միջազգային դիտորդներին, ապա Հայաստանում խորհրդարանական ընտրություններին հետևելու համար իրենց առաքելություններն են ուղարկել ԵԱՀԿ/ԺՀՄԻԳ-ը (258 դիտորդ),ԵԱՀԿ Խորհրդարանական Վեհաժողովը(69), ԵԽԽՎ (37), ԱՊՀ Միջխորհրդարանական վեհաժողովը (22), ԱՊՀ Դիտորդական առաքելությունը (151), ինչպես նաև Ընտրական համակարգերի միջազգային հիմնադրամը (IFES) և SILBA միջազգային կազմակերպությունը:
