34 բնակավայրերում ավելի շատ ընտրող կա, քան բնակիչ. այսօր լրագրողների հետ հանդիպման ժամանակ Հայաստանի իրավապաշտպան հասարակական կազմակերպությունները, այդ թվում՝ «Թրանսփերենսի ինթերնեյշնլ» հակակոռուպցիոն կենտրոնը ներկայացրին իրենց դիտարկումները 2012 թվականի խորհրդարանական ընտրությունների նախաշեմին ստեղծված իրավիճակի վերաբերյալ:
Անդրադառնալով նախընտրական քարոզչության ընթացքում տեղի ունեցած խախտումներին՝ «Թրանսփերենսի ինթերնեյշնլ» հակակոռուպցիոն կենտրոնի գործադիր տնօրեն Վարուժան Հոկտանյանն ասաց, որ կազմակերպության կողմից իրականացվող մի քանի նախնական ծրագրերից հետևություններ արդեն իսկ արվել են: Ըստ նրա՝ ծառայողական մեքենայով պետական պաշտոնյան գնում է քարոզարշավի կամ իրեն հատկացվող վարչական ռեսուրսն է օգտագործում։ Սակայն, նրա կարծիքով, շատ ավելի վտանգավոր երևույթների են ականատես դառնում, ինչպես օրինակ՝ համատարած կուսակցականացումը:
Վարուժան Հոկտանյանի խոսքով՝ շատ տհաճ է, երբ մարզպետերը գյուղապետերին կանչում են և հանձնարարում որոշակի ձայներ հայթայթել: Նա նշեց, որ այս երևույթները բավականին մեծ տեղ են գտել, որոնք կարող են ազդեցություն ունենալ ընտրությունների ելքի վրա: Վարուժան Հոկտանյանը տեղեկացրեց, որ ուսումնասիրություններ են կատարել քարոզարշավի ֆինանսավորման վերաբերյալ՝ դիտարկելով նախորդ և գործող Ընտրական օրենսգրքերը, և հավելեց, որ ընտրությունների մասնակցության վերաբերյալ ևս ուսումնասիրություններ են իրականացնելու:
