Թուրքական Milliyet թերթի փոխանցմամբ՝ Թուրքիայի ակադեմիական, լրագրողական և բյուրոկրատական շրջանակները զեկույց են պատրաստել՝ նվիրված Թուրքիայում ահաբեկչական հռչակված ու արգելված Քրդստանի աշխատավորական կուսակցությանը (PKK) կանանց անդամակցության խնդրին:
Զեկույցում նշված է. «Ինչո՞ւ են երկրի արևելյան և հարավարևելյան հատվածում բնակվող քուրդ աղջիկները բարձրանում լեռներն ու միանում PKK-ին: Այս հարցին կան մի շարք պատասխաններ. վաղ տարիքում ամուսնությունները, ընտանեկան ճնշումը, ընտանիքի ներսում բռնությունները, հասարակության կողմից վատ վերաբերմունքը և այլն:
PKK-ի անդամների 17-20 տոկոսը կանայք են: PKK-ին միացող քուրդ աղջիկների տարիքը տատանվում է 14-25-ի միջև: Քուրդ աղջիկներին ամուսնացնում են 14-15 տարեկանում՝ իրենցից տարիքով մեծ տղաների հետ: PKK-ին միացած կանանց մեծ մասն այդ ամուսնությունից փախչելու համար բարձրանում է լեռները: 2000-ական թվականներից հետո կանայք սկսել են ավելի գործուն դերակատարություն ունենալ PKK-ում»:
