Ս.թ. ապրիլի 30-ին թիվ 1 ընտրատարածքում մեծամասնական ընտրակարգով ԱԺ պատգամավորի թեկնածու առաջադրված Ստյոպա Սաֆարյանի նախընտրական շտաբում ահազանգ է ստացվել, որ Ավան թաղամասում խոչընդոտում են թեկնածուի և «Ժառանգության» քարոզչական նյութերը բաժանելուն:
Ահազանգի հետքով ժամը 13:00-ի մոտակայքում 6-րդ փողոց ժամանած Ստյոպա Սաֆարյանը, նրան ուղեկցող անձինք անձամբ ականատես դարձան, թե ինպես են մի խումբ մարդիկ խոչընդոտում քարոզարշավին: Խոչընդոտողների թվում էր Նառա անունով ներկայացած մի կին` ՀՀԿ շտաբի ակտիվիստներից, որն անգամ զգուշացումից հետո շարունակում էր մարդկանցից ետ հավաքել Ս.Սաֆարյանի ու «Ժառանգության» քարոզչական նյութերը: ՀՀԿ շտաբում հավաքված իր բուկլետները պատգամավորը տեսել է անձամբ:
Ժամը 14:00-ի մոտակայքում 3-րդ փողոցում հավաքվում են ՀՀԿ շտաբերի շուրջ 30 ակտիվիստներ և Սաֆարյանի քարոզչական խմբերի հասցեին հնչեցնում հայհոյախառն, վիրավորական արտահայտություններ ու սպառնալիքներ: Հատկապես աչքի են ընկել 2 տղամարդ, որոնք ժամանել էին 22OU171 պետհամարանիշով ջիպ ավտոմեքենայով: Ներկայանալ հրաժարված հիշյալ երկու անձինք աղմկել են և պնդել, որպեսզի Սաֆարյանը «հավաքի բանդան և հեռանա իրենց թաղից»:
Իրադրության հետագա սրում թույլ չտալու համար Սաֆարյանը զանգահարել է ոստիկանություն և հաղորդում տվել հանցագործության մասին: Ոստիկանություն դիմելուն պես խմբված ՀՀԿ-ականները լքել են տարածքը:
Անկախ միջադեպից Ս.Սաֆարյանը և նրա շտաբի անդամները շարունակել և ավարտել են ծրագրված քարոզարշավը:
Ցավալի է, որ կատարվածը դատապարտող հայտարարությամբ հանդես չեկան ոչ ՀՀԿ կուսակցությունը, ոչ էլ նրա մեծամասնական թեկնածուն` Ռուբեն Հայրապետյանը:
Կոչ ենք անում թիվ 1 ընտրատարածքում մրցակից թեկնածուին և իրավապահ մարմիններին` անհապաղ միջոցներ ձեռնարկել հետայսու ընտրատարածքում նման միջադեպերի կանխման ու լարվածության հետագա ուժգնացում թույլ չտալու համար: Այս մասին «Առաջին լրատվական»-ին հայտնում են «Ժառանգություն» կուսակցության նախընտրական շտաբից:
