Ֆրանսիայում աղվեսին բռնել են պետանկ խաղի համար գնդակների գողության մեջ: Ինչպես պարզվել է, կենդանին գողացել է 38 գնդակ։ Այս մասին գրում է La depeche-ը: Աղվեսին գողության մեջ բռնել հաջողվել է պետանկի խաղադաշտում տեղադրված տեսախցիկի միջոցով:
Ինչպես պատմել է կենդանու գործողություններից տուժած Պատրիկ Կյազը, դեռ 2012 թ. փետրվարին նա սկսել է նկատել, որ գնդակներն անհետանում են: Սկզբում նա ենթադրել է, որ դրանք վերցնում են հարևան երեխաները, և կորստին մեծ նշանակություն չի տվել:
Եվ քանի որ անհետացող գնդակների թիվը գնալով մեծանում էր, Կյազը որոշում է խաղադաշտում ինֆրակարմիր տեսախցիկ տեղադրել: Մի անգամ տեսախցիկին հաջողվել էր նկարել գնդակների հափշտակողին, որը պարզվում է՝ աղվեսն էր: Թե գնդակներն ինչի համար են անհրաժեշտ եղել, հայտնի չէ: Հնարավոր է՝ կենդանին դրանք շփոթել է հավի ձվերի հետ:
