Ամերիկյան բժիշկները կարծում են, որ երիկամների կրկնակի փոխպատվաստումը հնարավոր է: «Չիկագո քաղաքի մասնագիտացված կլինիկայում առաջին անգամ բարեհաջող վիրահատություն է տեղի ունեցել` դոնորից հիվանդին փոխպատվաստված երիկամը հիվանդի օրգանիզմը չի ընդունել, և այն փոխպատվաստել են մեկ այլ հիվանդի, և նրա մոտ այդ օրգանը գործում է արդեն մի քանի ամիս»,- լրագրողներին հայտարարել է Իլինոիս նահանգի Հյուսիս-արևմտյան համալսարանի վիրաբույժ, կրկնակի փոխպատվաստման ծրագրի ղեկավար Լորենցո Գոլլանը։ Այս մասին գրում է ИТАР-ТАСС-ը:
«Սա նման առաջին դեպքն է, որը վիրաբուժության մեջ նոր հնարավորություններ է բացում և դիալիզային սարքերից կառչած հազարավոր հիվանդներին հույս է տալիս»,- ընդգծել է նա:
Երիկամի փոխպատվաստման վիրահատությունն անհրաժեշտ է եղել Չիկագոյի բնակիչ 27-ամյա Ռոյ Ֆայրինգին: Որպես դոնոր հանդես է եկել նրա քույրը, որն իր երիկամներից մեկը տվել է եղբորը: Երկու օր անց բժիշկները սահմանել են, որ նրա օրգանիզմը չի ընդունել փոխպատվաստված երիկամը: Այդ երիկամը նրա օրգանիզմից անմիջապես հեռացվել է և տեղադրվել է 67-ամյա Էրվին Գոմեսի օրգանիզմում: Այս անգամ բարդություններ չեն եղել:
Կրկնակի փոխպատվաստման գլխավոր պայմանը «բժշկական սարքերի ճշգրտությունն է և բժիշկների օպերատիվությունը»,- գտնում է վիրաբույժը: Եթե օրգանիզմը չի ընդունում դոնորի օրգանն, ապա այն անհապաղ պետք է հանել: «Սակայն մեկ անգամ փոխպատվաստված օրգանի կրկնակի օգտագործումը շատ ռիսկային է»,- կարծում է Լորենցո Գալլին: Նրա խոսքերով՝ կրկնակի փոխպատվաստումն ապագայում ևս կլինի հազվադեպ արվող վիրահատություն:
