Գերմանացի երգիչ Դիտեր Բոլենը և Հանովերի արքայազն Էռնստ Ավգուստը դիմել են Մարդու իրավունքների եվրոպական դատարան՝ բողոքելով գերմանական դատարանների դեմ: Այս մասին գրում է Bild պարբերականը: Ավելի վաղ, Գերմանիայի բոլոր ատյանների դատարանները հրաժարվել էին բավարարել երաժշտի հայցն ընդդեմ Lucky Strike ծխախոտային ապրանքանիշի գովազդին: Ի դեպ, ապրանքանիշը պատկանում է British American Tobacco ընկերությանը:
Գովազդային պաստառը, որը նյարդայնացրել է երաժշտին, օգտագործում է 2003-ին իր գրած «Կուլիսների հետևում» գրքի գոյության փաստը: Պաստառում գրված է՝ «Տե՛ս, Դիտեր, թե ինչպես է պետք գրել գրքեր»: Bild-ի հարցազրույցում Բոլենն ասել է, որ ինքը հումորի զգացում ունի, սակայն այն վերջանում է, երբ ծխախոտային ընկերությունը սկսում է իր հաշվին արտադրանք գովազդել: Երաժիշտը չի ծխում և չի ցանկանում, որ իր անունը կապեն սիգարետների գովազդի հետ:
Հանովերի արքայազն Էռնստ Ավգուստին էլ զայրացրել է այն գովազդը, որը նրա «մարտերի» մասին ակնարկ է ներառում: Գովազդում երևում է սիգարետի տուփը, որի վրա գրված է. «Դա Է՞ռնստն էր, թե՞ Ավգուստը»: Արքայազնի կարծիքով՝ գովազդատուներն իրեն ավազակի կերպարով են ներկայացրել:
