Բրազիլիայի հյուսիսարևելյան Մարանիան նահանգի մայրաքաղաք Սան Լուիսը պաշտոնապես ընդունել է 2012-ին Ամերիկայի մշակութային մայրաքաղաքի կոչումը:
Մշակութային մայրաքաղաքների միջազգային բյուրոյի ընտրությունն այս քաղաքի համար հատուկ նշանակություն ունի. 2012-ին այն դառնում է 400 տարեկան:
Սան Լուիսը հիմնադրվել է 1612 թվականի սեպտեմբերի 8-ին՝ ֆրանսիացի կապիտան Դանիել դե լա Տուշի կողմից: Իր անվանումը քաղաքը ստացել է՝ ի պատիվ Ֆրանսիայի թագավոր Լյուդովիկոս 13-րդի:
3 տարի անց ֆրանսիական և հնդկական ցեղախմբերի միության դեմ հաղթանակելուց հետո, պորտուգալացիները կարողացել են քաղաքը վերցնել իրենց տիրապետության տակ:
Այս տարի Սան Լուիսում կանցկացվեն մշակութային բազմաթիվ միջոցառումներ, որոնք կգրավեն մեծ թվով զբոսաշրջիկների:
Սան Լուիսը հայտնի է իր հուշարձաններով (1997 թվականին այն ընդգրկվել է UNESCO-ի Համաշխարհային մշակութային ժառանգության ցուցակում. քաղաքի պատմական կենտրոնում պահպանվել են գաղութային ճարտարապետության ավելի քան 3500 շինություններ):
