Կոլորադո նահանգի Դենվեր քաղաքում ամերիկյան դատարանն ընդունել է, իրավաբանների կարծիքով, պատմական որոշում՝ պարտադրելով 65 հազար դոլար փոխհատուցում վճարել սպանված կենդանու համար:
Ինչպես հաղորդում է The Huffington Post առցանց պարբերականը, ավելի վաղ Կոլորադոյի բնակչուհի Ռոբին Լորը դատական հայց էր ներկայացրել Posh Maids ընկերության նկատմամբ, որը մասնագիտական ծառայություններ է մատակարարում հաստատությունների մաքրման հարցում: Անցյալ տարվա օգոստոսին Լորն իր տան համար դիմել էր ընկերության ծառայությանը: Ըստ պայմանավորվածության՝ երբ մաքրողը տուն գար, այդ ժամանակ տանը պիտի լիներ Ռութի անունով շունը, որին նա չպետք է թույլատրեր դուրս գալ տնից:
Ինքը՝ Լորը, այդ ընթացքում տանը չի եղել, իսկ երբ վերադարձել է, տանը հայտնաբերել է սատկած շանը: Երբ նա զանգահարել է Posh Maids, նրան հայտնել են, որ շունը դուրս է փախել տնից և ընկել մեքենայի տակ: Ընկերության աշխատակիցը դուրս է եկել, սակայն մեքենայի համարանիշը չի հասցրել գրանցել:
Մաքրողին թվացել է, որ շունը լուրջ չի վնասվել, ուստի նրան այդպես թողել է տանը և դուրս եկել՝ առանց գրություն թողնելու կամ որևէ կերպ տիրոջը նախազգուշացնելու: Դրանից հետո, Լորի խոսքերով, ընկերության աշխատակիցները հրաժարվել են կապ հաստատել իր հետ, ուստի ինքը դիմել է դատարան:
«Դատարանի վճիռը՝ ինձ վճարել 65 հազար դոլար փոխհատուցում, ապացուցում է, որ Ռութին ինձ համար հատուկ արժեք ուներ: Բայց ես հաճույքով կհրաժարվեի այդ գումարից, եթե հնարավոր լիներ նրան ետ վերադարձնել»,- ասել է Լորը:
