Գյումրիի տեղեկատվական տեխնոլոգիաների (ՏՏ) կենտրոնում այս տարվա մարտից սկսվել է մոբայլ տեխնոլոգիաների ուսուցում, որն իրականացվում է Ձեռնարկությունների ինկուբատոր հիմնադրամի աջակցությամբ և mLab-ի շրջանակներում: Ինչպես «Առաջին լրատվական»-ին տեղեկացրեց Գյումրիի ՏՏ կենտրոնի ղեկավար Ամալյա Եղոյանը, նպատակը տարածաշրջանում այդ տեխնոլոգիաները զարգացնելն է:
Ձմեռային արձակուրդների ընթացքում փորձարկային փուլ եղավ, ուսանողներին դիզայն ուսուցանվեց երևանյան մասնագետների կողմից, իսկ մարտից նեղ մասնագիտական՝ մասնավորապես AOS, iPhone application, Blackbarry և android ծրագրերն են սկսվել: Կենտրոնում ներկայում կա 40 ուսանող: Ըստ Ա. Եղոյանի՝ Գյումրիից և հարակից շրջաններից, նույնիսկ Երևանից դիմորդ կա:
2 application ուղարկվել է ՁԻՀ, իրենց աջակցությամբ տեղադրվել է Apple Store-ում: Blackbarry-ի մասով կենտրոնը փորձում է արտերկրից մասնագետ հրավիրել, որ թրեյներների համար ուսուցում կազմակերպվի, որպեսզի տեղական մասնագետները ուսուցանեն սաներին:
Մոբայլ տեխնոլոգիաների ընդհանուր ուսուցման կուրսը 2 տարի է, սկսվում է ci++ ծրագրավորման և java, նաև նախագծերի մենեջմենթի և այլ հարակից մասնագիտական առարկաների ուսուցանում: «Վերջնական նպատակն է ձևավորել մոբայլ ոլորտում բիզնես թիմ և արտապատվիրում կատարել նաև այդ ոլորտում: Հիմա պատվերներ շատ կան, բայց թիմ չունենք»,- նշեց Ա. Եղոյանը:
Նա նաև հայտնեց, որ ուսանողները պայմանագիր են ստորագրում, որ մնան Գյումրիում և աշխատեն, բայց Գյումրիում առաջարկը քիչ է, կարող են նաև Երևանում աշխատել: Ըստ նրա՝ աշխատատեղերի հարցում կօգնի նաև Գյումրիի տեխնոպարկի ձևավորումը. «Կարևորը, որ տեխնոպարկում ոչ միայն ծրագրավորում է լինելու, այլև արտադրական փակ շղթա՝ ինժեներ, մենեջմենթ և այլն»:
