Costa Concordia զբոսաշրջային նավը նավարկելի դարձնելու ու այն նավահանգիստ հասցնելու աշխատանքները կսկսվեն 2012 թ. մայիսին: Այս մասին հայտնում է Associated Press գործակալությունը՝ հղում կատարելով նավասեփականատեր ընկերության հայտարարությանը:
Նավն էվակուացնելու աշխատանքների համար հայտարարված մրցույթում հաղթել է ամերիկյան Titan Salvage ընկերությունը: Մրցույթի գլխավոր պահանջն էր նավն ամբողջությամբ տեղափոխելը՝ առանց այն մասնատելու: Սպասվում է, որ այդ գործընթացը կարող է տևել մինչև մեկ տարի:
Հիշեցնենք, որ 2012 թ. հունվարի 13-ին Տիրենեյան ծովում տեղի ունեցած աղետի արդյունքում նավը շրջվել էր: Որպես նավի կործանման պատճառ՝ նշվում է անձնակազմի սխալը, որի հետևանքով նավը շեղվել էր իր ուղուց ու հարվածել ստորջրյա քարերին: Ներկայում նավը թեքված է աջ կողքի՝ ափից 100 մետր հեռավորության վրա:
Ըստ մասնագետների՝ նավի վիճակը չափազանց անկայուն է, ու ալիքներն այն կարող են գցել ծանծաղուտը:
Costa Concordia-ի աղետը խլեց 32 ուղևորի կյանք, ևս 2 մարդ համարվում է անհետ կորած:
