Վրաստանի Փոթի նավահանգստում բացվել է ադրբեջանական պետական նավթագազային ընկերության վրացական դուստր ձեռնարկության կառուցած գազատարի առաջին հատվածը: Արարողությանը ներկա է եղել Վրաստանի նախագահ Միխեիլ Սաակաշվիլին, տեղեկացնում է Trend-ը: «Շուտով Փոթիում բնակվելու է 100000 մարդ, որոնց գազ է անհրաժեշտ: Մեզ այդ հարցում օգնում է SOCAR-ը, և մենք շնորհակալ ենք ադրբեջանական ընկերությանը», ասել է Սաակաշվիլին: Նրա խոսքով, առանց գազաֆիկացման` Փոթիում հնարավոր չէր լինի որևէ նախագիծ իրականացնել: Նախագահը նաև շեշտել է, որ չնայած աշխարհում աճում են վառելիքի գները, Ադրբեջանի և Վրաստանի միջև գործող պայմանագրի շնորհիվ իրենց համար գներն անփոփոխ են: Փոթիի գազամուղի երկարությունը 6,8 կիլոմետր է. այն գազով կապահովի 700-ից ավելի բաժանորդների: