Պարսից ծոցի արաբական երկրների զբոսաշրջիկները Եվրոպայում միլիոնավոր դոլարներ են ծախսում շոկոլադի վրա: Յուրաքանչյուր մարդ միջինը 3 հազար դոլար է ծախսում այդ նպատակով:
«Ալ-Արաբիա» հեռուստաալիքի փոխանցմամբ` հարուստ արաբների մոտ հարգի են Շվեյցարիայի, Բելգիայի, Գերմանիայի և Մեծ Բրիտանիայի արտադրության թանկարժեք շոկոլադները: Ինչպես ասել են զբոսաշրջիկները, եվրոպական արտադրանքը բոլոր առումներով շատ է տարբերվում արաբականից։ Բացի այդ, Արևմուտքում առկա շատ քաղցրավենիքներ արաբական երկրներում չկան:
Պարսից ծոցի երկրներում թանկարժեք շոկոլադը լավ նվեր է համարվում ցանկացած ճաշակի տեր մարդու համար, մանավանդ, երբ դրա գինը սկսվում է տուփը 250 դոլարից: Ինչպես հեռուստաընկերությանը տեղեկացրել է զբոսաշրջիկներին ուղեկցող Նաուաֆ Ալ-Անզին, ամենաքաղցրակեր արաբները Քուվեյթից են: Ալ-Անզիի խոսքերով` արաբները հաճախ գնում են մոտ 8 հազար դոլարի շոկոլադ:
