«Քաղաքացիական հասարակության ինստիտուտ» ՀԿ խորհրդի նախագահ Արտակ Կիրակոսյանը այսօր լրագրողներին ներկայացրեց ընտրական կեղծիքները կանխարգելող միջոցառումների ծրագիրը, որն իրականացվում է իրենց ՀԿ-ի միջոցով:
Նա նշեց, որ այս միտքը ծնվել էր 2007 թվականին` տարբեր կազմակերպությունների կողմից, ովքեր հիմնական շեշտը դնում էին իրավաբանական օգնության ցուցաբերման վրա, այնուհետև, նրանց հետ քննարկելով, մենք խորացրինք գաղափարը:
«Մեծ մասամբ ՀԿ-ները դիտորդական առաքելություն իրականացնելիս սահմանափակվում են խախտումներն արձանագրելով. դա, իհարկե, ունի կանխարգելիչ դեր, բայց մեր հիմնական նպատակը ընտրությունների ընթացքում մարդու իրավունքների խախտումներն արձանագրելն ու կանխարգելելն է»:
Այս տարի նրանք ունենալու են 30 մեքենաներ, որոնցից 7-ը շրջելու է Երևան քաղաքում:
Արտակ Կիրակոսյանի խոսքերով` նման առաքելություն այլ կազմակերպություններ ևս իրականացնում են, բայց ի տարբերություն նրանց` իրենց խմբում կան նաև լրագրողներ. «Շատ կարևոր է, որ ապահովվի չեզոքություն և հրապարակայնություն: Առաջին քայլն այն է, որ մարդիկ զանգում են մեզ, նրանց տրամադրում ենք խորհրդատվություն` մինչև դեպքի վայր հասնելը»:
Խորհրդի նախագահի խոսքերով` ամենաշատ ահազանգեր ստացվել են 2008 թվականի ընտրությունների ժամանակ. 750 ահազանգ` ամբողջ ընտրական գործընթացի ընթացքում, 450-ից ավելի` ընտրությունների օրը:
«Ընտրախախտումների մեծ մասը կապված էր ցուցակներում ընտրողների անունների բացակայության հետ, իսկ այս տարի լրիվ հակառակ պատկերն է` ցուցակներում չափից շատ մարդ կա գրանցված: Մեր հիմնական նպատակը այդ խախտումներին արձագանքելն ու լուծում տալն է: Իսկ ընտրախախտումներին տեղեկանում ենք թեժ գծի միջոցով՝ 080080804»,- ամփոփեց Ա. Կիրակոսյանը:
