Անահիտ Բախշյանը կրկին հավաստում է, որ դրամական լուրջ պարգև է խոստանում նրան, ով ընտրակաշառքի պահը պատկերող լուսանկար կներկայացնի իրեն:
«Թե չէ` զանգում, ասում են` այստեղ ընտրակաշառք են բաժանում, այնտեղ` մուրաբա կամ տրակտոր». Քաղաքական և միջազգային հետազոտությունների հայկական կենտրոնի՝ այսօր կազմակերպած քաղաքական բանավեճի ժամանակ ասաց թիվ 12 ընտրատարածքում մեծամասնական ընտրակարգով պատգամավորության թեկնածու առաջադրված «Ժառանգություն» կուսակցության պատգամավոր Անահիտ Բախշյանը:
«Ընտրակաշառքների ու խախտումների դեմն առնելու համար ճիշտ կլինի, որ թիվ 12 ընտրատարածքում առաջադրված պատգամավորության ընդդիմադիր չորս թեկնածուները միավորվեն և ընտրությունների ընթացքը վերահսկող միասնական շտաբ ստեղծեն:
Օրինակ` երեկ իմ շտաբ են զանգահարել Էրեբունի վարչական շրջանի Խաղաղ Դոնի թիվ մեկ հասցեից՝ փաստելով, որ ՕԵԿ-ն այնտեղ հեռախոսներ է բաժանում: Բայց հուսանք, որ կկարողանանք կանխել ընտրախախտումները, և թիվ 12-ից ԱԺ կանցնի ընդդիմադիր թեկնածու:
Գիտեմ՝ նախընտրական քարոզարշավը թեժ է լինելու, սակայն չպետք է դուրս գալ մարդկային հարաբերությունների սահմաններից»,- նշեց Անահիտ Բախշյանը:
Բանավեճին ներկա` Բախշյանի մրցակից Գոհար Վեզիրյանն իր հերթին անտրամաբանական և աբսուրդ համարեց լրագրողներից մեկի այն հարցը, թե ԲՀԿ-ն թաքուն հովանավորում է իրեն: «Ո՞ւր էր ինձ տենց բախտ»,- նշեց նա՝ հավելելով, որ ինքը ԲՀԿ-ի աջակցության կարիքը չունի:
