Ինչպես հայտնում է Europe1 ռադիոընկերությունը, Ֆրանսիայի նախագահ Նիկոլա Սարկոզիի Facebook սոցիալական ցանցի անձնական էջից հազարավոր մարդիկ տեղեկացել են, որ երկրի նախագահն այլևս չի առաջադրելու իր թեկնածությունը նախագահական ընտրությունների ժամանակ: «Հարգելի հայրենակիցներ, բացառիկ հանգամանքներից ելնելով, որոնք հայտնի են ողջ երկրին, ես որոշում եմ կայացրել չառաջադրել իմ թեկնածությունը հաջորդ` 2012 թ. նախագահական ընտրությունների ժամանակ»,- ասված է «հայտարարության» մեջ:
Սակայն հետագայում պարզվել է, որ հաքերները Սարկոզիի էջը կոտրել են ու տեղադրել այդ հայտարարությունը: Բացի այդ, նրա պատին կար ևս մեկ հրապարակում, որով կոչ էր արվում միանալ նոր ստեղծված ֆեյսբուքյան խմբին, որտեղ հրավեր կար մասնակցելու 2012 թ. մայիսի 6-ին կայանալիք ֆուրշետին, որի ժամանակ Սարկոզին հայտարարելու է հրաժարականի մասին:
