Իսպանիայի տնտեսությունը կրկին հայտնվել է ռեցեսիայի վիճակում: Այս մասին հայտարարել է Իսպանիայի Կենտրոնական բանկի նախագահ Միգել Ֆերնանդես Օրդոնեսը:
Տեխնիկական ռեցեսիա է համարվում երկրի համախառն ներքին արդյունքի կրճատումը: Օրդենեսի խոսքերով` 2011 թ. չորրորդ եռամսյակում Իսպանիայի տնտեսությունը կրճատվել է 0,3 %-ով, և այս միտումը շարունակվել է նաև հաջորդ տարվա առաջին եռմասյակում: Դրա հետ մեկտեղ ԿԲ-ի նախագահը հստակ տվյալներ չի ներկայացրել 2012 թ. առաջին երեք ամիսներին ՀՆԱ-ի անկման վերաբերյալ:
The Daily Telegraph-ի փոխանցմամբ` Իսպանիայի էկոնոմիկայի նախարար Լուիս դե Գինդոսը հայտարարել է, որ առաջին եռամսյակում ՀՆԱ-ի կրճատումը կարող է լինել այնքան, որքան եղել է 2011 թ. վերջին եռամսյակում: Նախարարը ևս ընդունել է, որ Իսպանիայի տնտեսությունը կրկին ռեցեսիայի շրջանում է գտնվում:
Հիշեցնենք, որ Իսպանիան ռեցեսիայի մեջ է գտնվել 2009 թ. համաշխարհային տնտեսական ճգնաժամի ժամանակ: Երկրի ՀՆԱ-ի կրճատումը դադարեց միայն 2010 թ. սկզբներին, սակայն վերջին ժամանակներս Իսպանիան, ինչպես մյուս շատ եվրոպական երկրներ, պարտքային ճգնաժամի զոհ է դարձել:
Իսպանիայի նոր իշխանությունները՝ վարչապետ Մարիանո Ռախոյայի գլխավորությամբ, խոստացել են 2012 թ. ընթացքում բյուջեի ծախսերը կրճատել 16.5 միլիոն եվրոյով:
